Jasandy ıntellekt kómegimen túsirilgen fılmderdiń halyqaralyq festıvali — Astana AI Film Festival-ǵa álemniń 90 elinen 1900-den astam ótinim tústi. Bul festıvál qorynyń Qamqorshylyq keńesiniń otyrysynda belgili boldy. Onda konkýrstyq baǵdarlama, Astana Digital Bridge aıasyndaǵy is-sharany daıyndaý, sondaı-aq Astananyń qatysýshylar men qonaqtardy qabyldaýǵa daıyndyǵy talqylandy, dep habarlaıdy infohub.kz.
Eń kóp jumys AQSH-tan tústi — bul barlyq ótinimniń 17%-y. Ekinshi orynda Úndistan — 10%, Qazaqstan — 8%. Ońtústik Koreıa men Qytaıǵa 5%-dan, Ulybrıtanıaǵa 4%, Reseı men Gonkongqa 3%-dan tıesili.
Uıymdastyrýshylardyń aıtýynsha, ótinimderdiń keń geografıasy kásibı qaýymnyń kıno ónerinde jasandy ıntellektti qoldanýǵa degen qyzyǵýshylyǵynyń artyp kele jatqanyn kórsetedi.
Festıváldiń halyqaralyq qazylar alqasyna IýNESKO-nyń burynǵy Bas dırektory Odre Azýle, China Film Group ókili Ma Pın jáne Pekın kınoakademıasynyń ókili Van Hao kirdi. Astana AI Film Festival-dyń bas seriktesi — Freedom Holding Corp.
Astana AI Film Festival 2026 jyldyń 1-3 qazany aralyǵynda Astanada Astana AI Week aıasynda ótedi. Bas konkýrs «The future worth living in» — «Ómir súrýge turarlyq bolashaq» taqyrybynda ótedi. Júlde qory — 1 mıllıon dollar.
Negizgi konkýrstan bólek, bes nomınasıadan turatyn ashyq seksıa qarastyrylǵan. Ótinimderdi qabyldaý tamyz aıynyń sońyna deıin jalǵasady.
Festıváldiń resmı baǵdarlamasyndaǵy fılmder alǵash ret Astanadaǵy Chaplin kınoteatrynyń úlken ekranynda kórsetiledi. İskerlik baǵdarlama Digital Bridge forýmy aıasynda ótip, jasandy ıntellekt, kıno jáne sıfrlyq shyǵarmashylyq salasyndaǵy halyqaralyq sarapshylardyń qatysýymen plenarlyq jáne paneldik sesıalar, vorkshoptar men sheberlik synyptaryn qamtıdy.
Otyrysqa qatysýshylar Qytaımen yntymaqtastyqty erekshe atap ótti. AI-kıno salasyndaǵy Qazaqstan-Qytaı ınovasıalyq almasý forýmynyń qorytyndysy boıynsha Astana AI Film Festival qory Beijing Zhongguancun Tongli Technology Service Co., Ltd. kompanıasymen memorandýmǵa qol qoıdy. Qytaılyq kompanıa festıváldiń QHR-daǵy resmı ókili boldy.
Festıváldi ótkizý memleket basshysy Qasym-Jomart Toqaev jarıalaǵan 2026 jyldy Sıfrlandyrý jáne jasandy ıntellekt jyly dep jarıalaýymen baılanystyrylýda.