Astanada aqyly turaqtar resmı túrde ákimdik menshigine ótti. Endi olardan túsken barlyq kiris jergilikti búdjetke baǵyttalady, dep habarlaıdy infohub.kz saıty.
«Jetinshi arna» habarlaǵandaı, júrgizýshiler úshin ázirge eshteńe ózgergen joq: tártip burynǵysha — turaqtadyń, tólediń, kettiń. Baǵasy da sol — saǵatyna 100 teńge. Aıyrmashylyq tek aqyly turaqtardan túsken barlyq kiristiń endi jergilikti búdjetke jiberilýinde. Al ákimdik onyń ornyna kólik turaǵynyń sanyn kóbeıtýdi ýáde etip otyr.
«Búgingi tańda Astanada 530-nan astam turaq aımaǵy jumys istep tur, olar 10 myńnan astam turaq ornyna eseptelgen. Qazirgi ýaqytta osy turaq oryndaryn 1 myńnan astam orynǵa kóbeıtý qarastyrylýda. Bul keıbir kóshe-jol jelisi ýchaskelerinde suranystyń artýyna baılanysty», — dedi Astananyń jol qozǵalysyn uıymdastyrý ortalyǵy dırektorynyń orynbasary Rýslan Abdýalıev.
Jańalyqtar tek turaq sanyna qatysty emes. Barlyq oryndy jańartý josparlanyp otyr, al kólikti belgi syzyǵyna kóldeneń qoıýǵa endi tyıym salynady. Sondaı-aq júrgizýshiler úshin turaq nómiri men onyń kartadaǵy ornyn birden kórsetetin jańa qosymsha iske qosyldy. Burynǵy tólem ádisteri men aqparattyq taqtalardaǵy QR-kodtar ózgerissiz qalady.
Júrgizýshilerdiń jańalyqqa kózqarasy ártúrli. Bireýler turaq úshin tólengen aqsha búdjetke túsýi kerek dese, endi bireýleri oryn úshin aqy tóleýdiń máni joq dep sanaıdy.
«Aqsha memleketke, jeke adamǵa emes, barady. Olar báribir bir jerge jumsalatyn shyǵar», — deıdi bir júrgizýshi.
«Biz turaqtaımyz, bárin tóleımiz. Turaq oryndary aqyly bolmasa eken, óıtkeni biz úshin sonsha jer aqyly, menińshe, bul durys emes», — deıdi ekinshisi.
«Menińshe, bul durys. Turaq úshin bizden alynatyn aqsha kerek jerge barady. Men buǵan kelisemin», — dep qoldaıdy úshinshisi.
Alaıda «Astananyń turaq keńistigi» osy jyldar ishinde qansha tabys tapqanyn ákimdik aıtpaıdy. Qaıta uıymdastyrý áli júrip jatqanyn, sondyqtan naqty soma joq ekenin atap ótedi. Biraq elorda júrgizýshileri úshin bastysy ázirge ózgerissiz qalyp otyr — turaq áli de aqyly, al basqarý júıesi endi memlekettik bolady.
Eske salaıyq, 2025 jyldyń jeltoqsanynda elorda ákimdigi men «Parkovochnoe prostranstvo» JSHS arasynda seriktestiktiń 100% úlesin qala ákimdigine tegin berý týraly aldyn ala shartqa qol qoıylǵan bolatyn. Astana ákimi Jeńis Qasymbek sol kezde aqyly turaqtar ákimdikke ótkennen keıin jumystyń qalaı qurylatynyn aıtqan edi. Onyń sózinshe, kóptegen oryn múldem tegin bolady.