Astanada vandalızm faktileri jıilep ketti: buzaqylardyń áreketinen aıaldamalar, oryndyqtar, qoqys jáshikteri men músinder zardap shegýde. Bul týraly áleýmettik jelilerde elorda ákimi Jeńis Qasymbek jazdy, dep habarlaıdy infohub.kz saıty.
Onyń aıtýynsha, Astanada bóten jáne komýnaldyq múlikti búldirgeni úshin 143 adam jaýapkershilikke tartylǵan, olardyń arasynda kámeletke tolmaǵandar da bar.
Sonymen qatar elordada qoǵamdyq oryndardy lastaýǵa baılanysty 928 ákimshilik quqyqbuzýshylyq tirkelgen.
«Qalalyq ınfraqurylymdy búldire otyryp, buzaqylar tek qalaǵa ǵana zıan keltirip qoımaı, barlyq turǵyn men elorda qonaqtaryna — sonyń ishinde kún saıyn osy kóshelermen júretin óz týystary men jaqyndaryna da qolaısyzdyq týǵyzady», — dep jazdy Qasymbek.
Ákimniń málimdeýinshe, polısıa kóshelerdi kún saıyn patrúldep, buzaqylardy anyqtap júr. Qalada beınebaqylaý kameralarynyń sany artyp, esirtki jarnamasy bar graffıtıler joıylýda.
«Zańǵa sáıkes qoǵamǵa jat qylyqtar qylmystyq jaýapkershilikke tartýǵa deıin qatań jazalanady. Sondaı-aq kámeletke tolmaǵan buzaqylardyń ata-analary da jaýapkershilikke tartylady. Barlyq turǵyn men elorda qonaqtaryn biz ózimiz, týystarymyz ben jaqyndarymyz turatyn qalamyzǵa uqypty qaraýǵa shaqyramyn», — dedi ákim.
Buǵan deıin «Kýrsıv» Astanadaǵy Jýrnalıser aleıasynda vandalızm jasady dep 18 jastaǵy jigit pen jasóspirimge kúdik salynǵanyn jazǵan. Al Shymkentte vandaldar jańa skverdegi shahmat besedkasyn búldirip tastaǵan.