Astana turǵyny alaıaqtyq úshin kináli dep tanyldy: ol TikTok arqyly Anglıaǵa jumysqa ornalastyrýdyń atymen 10 qazaqstandyqty 1 mln teńgeden astam somaǵa aldaǵan, dep habarlaıdy infohub.kz.
Tergeý derekterine sáıkes, er adam TikTok-ta qazaqstandyqtarǵa Anglıadan jumys tabýǵa kómektesý týraly habarlandyrýlar ornalastyrǵan. Astana prokýratýrasynyń málimetinshe, áleýetti klıenttermen hat jazysý kezinde ol zańdy qyzmetpen aınalysyp jatqandaı áser qaldyrǵan: keńes berip, saýalnamalar toltyrýǵa baǵyttap, qujattardy rásimdeý prosesin súıemeldegen. Odan keıin kúdikti azamattardy jumysqa ornalastyrý qyzmeti úshin tólem retinde aqsha aýdarýǵa kóndirgen.
Aqshany alǵan soń, ol óz mindettemelerin oryndamaǵan, al jymqyrylǵan qarajatty óz qalaýy boıynsha jumsaǵan. Alaıaqtyq sqemanyń saldarynan 10 azamat zardap shekken. Keltirilgen materıaldyq zalaldyń jalpy somasy 1 mln teńgeden asty, dep atap ótti Astana qadaǵalaý organynda.
Sot otyrysy barysynda memlekettik aıyptaýdy Astana prokýratýrasy qoldady. Sottalýshynyń kinási sot zerttegen dáleldemelerdiń jıyntyǵymen tolyq dáleldendi. Jaza taǵaıyndaý kezinde sot kináni moıyndaýy, sottalýshynyń ókinýi, onyń sottalmaǵandyǵy, sondaı-aq keltirilgen materıaldyq zalaldy erikti túrde ótegenin eskerdi.
Sot úkimimen er adamǵa 3 jyl 6 aı bas bostandyǵyn shekteý jazasy taǵaıyndalyp, probasıalyq baqylaý belgilendi. Sonymen qatar, sottalýshyǵa birqatar mindetter júkteldi. Oǵan probasıa qyzmetin habardar etpeı turǵylyqty jeri men jumysyn ózgertýge, аlkogóldik ishimdikter ishýge baılanysty oıyn-saýyq oryndaryna (sonyń ishinde meıramhanalar, barlar men kafeler) barýǵa tyıym salyndy, al jumysy bolmasa, ol jumyssyz retinde tirkelýi tıis. Sondaı-aq sot túngi ýaqytta (saǵat 22:00-den 06:00-ge deıin) turǵylyqty jerinen tys jerde bolýǵa shekteý qoıdy. Eger sottalýshynyń turaqty jumysy nemese oqý orny bolmasa, ol jaza merzimi ishinde jyl saıyn 100 saǵat májbúrli eńbekke tartylýǵa tıis.
Astana prokýratýrasy azamattardy shetelden jumys izdeý kezinde saq bolýǵa shaqyrdy. Vedomstvo bos jumys oryndary týraly aqparatty tek resmı kózderden alýdy, lısenzıasy bar kadrlyq agenttikterge júginýdi jáne ýákiletti memlekettik organdardyń qyzmetterin paıdalanýdy usynady, osylaısha alaıaqtardyń qurbany bolmaýǵa bolady.