Астанада сериялық алаяқтық жасады деп күдіктелген 33 жастағы әйел ұсталды. Тергеу нұсқасы бойынша, ол ата-аналарға балаларын мемлекеттік балабақшаларға кезексіз орналастыруға уәде берген, деп хабарлайды infohub.kz сайты.
Құқық қорғау органдарының мәліметінше, күдікті өз құрбандарын әлеуметтік желілерден іздеген. Ол елорданың мемлекеттік мектепке дейінгі мекемелері туралы жарияланымдардың астына пікір жазып отырған.
«Әйел ата-аналардың сеніміне кіріп, балаларын мемлекеттік балабақшаларға кезексіз орналастыруға уәде берді. Содан кейін ол азаматтарды ақшаны өзінің банк шотына аударуға көндірді. Алынған қаражатты күдікті жеке қажеттіліктеріне жұмсаған», — делінген Ішкі істер министрлігінің медиапорталындағы хабарламада.
Бүгінде тергеу оның құқыққа қарсы әрекетінің 10 эпизодын ресми түрде анықтады. Полицейлер келтірілген шығынның нақты мөлшерін анықтап, ұсталған әйелдің басқа да осыған ұқсас қылмыстарға қатысын тексеруде.
Осы факті бойынша сотқа дейінгі тергеу жүргізілуде. Осыған байланысты полиция қазақстандықтарға ескерту жасады: ведомство азаматтарды әлеуметтік желілердегі күмәнді қызметтерден аулақ болуға және мемлекеттік қызметтерді алу үшін тек ресми арналарды пайдалануға шақырды.