19 qyrkúıekten bastap Astanada elimizdiń óńirlerinen kelgen fermerler men óndirýshiler qatysatyn aýylsharýashylyq jármeńkeleri bastalady. Ónim qazan aıynyń sońyna deıin demalys kúnderi satylady, dep habarlaıdy infohub.kz saıty.
Saýda «Qazanat» ıpodromynyń avtoturaǵynda ótedi. Mekenjaıy: Qarqaraly tas joly, 1. Jármeńkeler kelýshiler úshin saǵat 9:00-den 18:00-ge deıin ashyq bolady.
Jármeńkelerdiń jumys kestesi óńirler boıynsha bylaı bólingen:
19–20 qyrkúıek — Qyzylorda jáne Atyraý oblystary;
26–27 qyrkúıek — Abaı, Almaty jáne Mańǵystaý oblystary;
3–4 qazan — Shyǵys Qazaqstan jáne Aqtóbe oblystary;
10–11 qazan — Túrkistan jáne Batys Qazaqstan oblystary;
17–18 qazan — Soltústik Qazaqstan, Pavlodar jáne Ulytaý oblystary;
24–25 qazan — Qaraǵandy jáne Qostanaı oblystary.
Jármeńke aıasynda elorda turǵyndary men qonaqtary et, balyq, sút ónimderi, bakaleıa, kókónis, jemis-jıdek jáne ózge de otandyq taýarlardy satyp ala alady.
Kelýshilerge qolaıly bolý úshin jármeńke ótetin jerge avtobýs qatynasy uıymdastyrylady. Atap aıtqanda, №18, 37 jáne 303 baǵyttary júredi.
Ákimdik málimetinshe, byltyr óńirlik aýylsharýashylyq jármeńkesine 17 óńirden 600-den astam óndirýshi qatysqan. Onyń barysynda 10 myń tonnadan astam ónim satylǵan.
Buǵan deıin «Kýrsıv» Astanada 12 jáne 13 qyrkúıekte turǵyndar aýylsharýashylyq jármeńkelerinen et, kókónis, jemis-jıdek, sút jáne un ónimderin satyp ala alatynyn habarlaǵan.