Qazaqstan astanasynda qoǵamdyq kólikte qymbat turatyn tehnıka joǵalǵan eki oqıǵa tirkeldi. Alaıda polısıa qyzmetkerleriniń jedel áreketiniń arqasynda eki qurylǵy da ıelerine qaıtaryldy, dep habarlaıdy infohub.kz saıty.
NUR.KZ agenttiginiń Astana qalalyq polısıa departamentine silteme jasap habarlaýynsha, alǵashqy ótinish avtobýspen júrip bara jatyp iPhone smartfonynan aıyrylǵan qala turǵynynan túsken.
«Aldyn ala derekterge qaraǵanda, áıel qurylǵyny avtobýs salonynda abaılamaı túsirip alǵan. Keıin ony sol jerde bolǵan jas jigit alyp ketken. Jedel izdestirý is-sharalary barysynda polısıa qyzmetkerleri onyń jeke basyn anyqtap, taýyp aldy. Nátıjesinde telefon tabylyp, ıesine aman-esen qaıtaryldy», — delingen vedomstvo habarlamasynda.
Osyǵan uqsas oqıǵa Astananyń taǵy bir turǵynymen de boldy. Er adam marshrýttyq avtobýstyń artqy oryndyǵyna kók sómkedegi noýtbýgin qaldyryp ketken. Shamamen on mınýttan keıin kólik júrgizýshisi qaldyrylǵan tehnıkanyń ornynda joq ekenin baıqaǵan.
Jedel izdestirý is-sharalary barysynda tártip saqshylary joǵalǵan noýtbýktiń ornalasqan jerin anyqtap, tapty.
Polısıa azamattarǵa qoǵamdyq kólikte nemese basqa da jerlerde jeke zattaryn joǵaltqan jaǵdaıda quqyq qorǵaý organdaryna ýaqtyly júginý qajettigin eske saldy.
«Eger qoǵamdyq kólikte nemese basqa jerde jeke zattaryńyzdy joǵaltsańyz, polısıaǵa ýaqtyly júginip, barlyq belgili mán-jaılardy habarlaý mańyzdy. Bul múlikti izdeý boıynsha qajetti sharalardy jedel qabyldaýǵa kómektesedi», — dep atap ótti vedomstvoda.