Álemniń basty qalalarynyń birine Astanadan ushý ońaıyraq bola tústi: Air China áýekompanıasy Qazaqstan astanasynan Beıjińge reıs jıiligin aptasyna alty retke deıin arttyrdy, dep habarlaıdy infohub.kz saıty.
Astana halyqaralyq áýejaıynyń baspasóz qyzmetiniń málimetinshe, tamyz aıynyń basynan bastap Air China áýekompanıasy Astana halyqaralyq áýejaıynan Beıjińge reıs jıiligin aptasyna alty retke deıin arttyrǵan. Úsh reıs Astana — Beıjiń baǵyty boıynsha tikeleı oryndalsa, taǵy úsheýi Astana — Sıan — Beıjiń baǵytymen júzege asyrylady.
«Reıs jıiliginiń artýyna baılanysty Qazaqstan astanasynyń turǵyndary Qytaıǵa saparlaryn josparlaýda kóbirek múmkindikke ıe boldy. Endi saıahatshylar óz josparlaryna qaraı eń qolaıly nusqany tańdaı alady: Astanadan Beıjińge tikeleı reıspen ushý nemese Sıan arqyly Qytaı astanasyna barý», — delingen habarlamada.
Sonymen qatar, baspasóz qyzmeti reıs sanynyń artýy týrısik jáne iskerlik saparlar úshin saıahat kúnderin ıkemdi tańdaýǵa múmkindik beretinin atap ótti.
Astana — Sıan — Beıjiń baǵytyndaǵy reıster dúısenbi, sársenbi jáne juma kúnderi oryndalady. Al Astana — Beıjiń baǵyty boıynsha — seısenbi, beısenbi jáne senbi kúnderi.