Astanada ondaǵan otbasy baspanasyz qalý qaýpine tap boldy. Qurylys kompanıasynyń basshylyǵy bir páterlerdi birneshe adamǵa satyp jibergen, dep infohub.kz habarlaıdy.
Astanada bir páterlerdi birneshe ret satty dep kúdikke ilingen qurylys kompanıasynyń basshylyǵyna qatysty qylmystyq is boıynsha tergeý aıaqtaldy. Aıyptaý aktisi sotqa joldandy. Tergeý dereginshe, jalpy shyǵyn 4,5 mlrd teńgeden asqan.
Zardap shekkenderdiń arasynda Malıkovtar otbasy bar. Olar 2024 jyly páter satyp alyp, mámile rásimdep, menshik quqyǵyn tirkep, páterge kirip ketken. Biraq birneshe aıdan keıin páterge tyıym salyndy.
«Páter ıesimen satyp alý-satý shartyn jasadyq. Aqshany tolyq tólep, mámileni aıaqtadyq. Eki kúnnen keıin eGov arqyly páterde eshqandaı shekteý joq ekeni týraly anyqtama aldyq. Páter taza, atymyzǵa tirkeldi. Kirip, jańa úı toıyn ótkizdik. Biraq 2025 jyldyń kúzinde páterge tyıym salynǵanyn bildik», — dedi Astana turǵyny Samat Malıkov.
Qylmystyq is materıaldaryna sáıkes, ondaǵan satyp alýshy osyndaı jaǵdaıǵa tap bolǵan. Zardap shekkender retinde 51 adam jáne bir zańdy tulǵa tanylǵan. Qujattarda satýshy retinde «International Invest Company IIC» JSHS kórsetilgen.
«2025 jyldyń 10 qańtarynda men úsh páter satyp aldym. Kompanıaǵa qolma-qol aqsha tóledim. Aqshany kompanıa ıeleri óz qoldarymen qabyldady. Olar aqshany ózderi sanap, alyp, maǵan úsh kelisimshart pen úsh tólem tapsyrmasyn berdi. Sodan keıin qurylysqa ruqsat, paıdalanýǵa berý aktisi, №2 nysan sıaqty barlyq qujattardy kórsetip, bári zańdy ekenin, páterge kirip, jóndeý jumystaryn júrgizýge bolatynyn aıtty», — dedi ol.
Elordalyq Ekonomıkalyq tergeý departamentiniń málimetinshe, tórt adam qylmystyq jaýapkershilikke tartylǵan. Tergeýshilerdiń pikirinshe, sharttar kompanıa keńsesinde aıyptalýshylardyń qatysýymen jasalyp, aqsha berilgen.
Vedomstvo dereginshe, aqsha olardyń jeke shottaryna túsken, biraq býhgalterlik qujattarda da, bank júıesinde de bul aqshanyń kimge tıesili ekeni kórinbegen. Tergeý bul sqema salyq tóleýden jaltarýǵa múmkindik bergen dep esepteıdi. Sondaı-aq, eki jyl boıy bir páterlerdiń birneshe satyp alýshyǵa satylǵany anyqtalǵan.
«Sotqa deıingi tergeý aıaqtalyp, aıyptaý aktisin Astana qalasynyń prokýratýrasy bekitti, sodan keıin qylmystyq is Astana qalasynyń qylmystyq ister jónindegi aýdanaralyq sotyna qaraýǵa jiberildi. Sottalýshylar QR QK-niń 189-baby 4-bóligi 2-tarmaǵy, 190-baby 4-bóligi 2-tarmaǵy jáne 399-baby 1-bóliginde kózdelgen qylmystyq quqyq buzýshylyqtardy jasady dep aıyptalýda», — delingen quqyq qorǵaý organdarynyń habarlamasynda.
Astana prokýratýrasy aıyptaý úkimi shyqqan jaǵdaıda fıgýranttarǵa 5-ten 12 jylǵa deıin bas bostandyǵynan aıyrý jazasy taǵaıyndalýy múmkin ekenin aıtty. Tyıym salynǵan páterlerdiń odan ári taǵdyryn sot anyqtaıdy.
Satyp alýshylar óz quqyqtaryn azamattyq tártipte qorǵaýǵa májbúr bolatynynan qaýiptenedi. Olardyń kópshiligi satyp alǵan baspanasy jalǵyz jyljymaıtyn múlik ekenin aıtady.