«Astana» basketbol klýbynyń aınalasyndaǵy jaǵdaıǵa Qazaqstan Týrızm jáne sport mınıstrligi Sport jáne dene shynyqtyrý isteri komıteti resmı túsinikteme berdi, dep habarlaıdy infohub.kz saıty.
Vedomstvonyń aıtýynsha, sońǵy jyldary klýbtyń halyqaralyq arenadaǵy óneri qoıylǵan mindetter men kútken nátıjege sáıkes kelmegen. Ótken maýsymda Biryńǵaı VTB lıgasynda «Astana» sońǵy, 12-oryndy ıelenip, 44 oıynnyń tek ekeýinde jeńiske jetken. Jeńilis paıyzy 95%-dan asyp, bul klýbtyń lıgadaǵy búkil tarıhyndaǵy eń nashar kórsetkish boldy. Sonymen qatar, komanda segiz jyl boıy osy týrnırdiń pleı-off kezeńine shyǵa almady.
İshki arenada da «Astana» basketbol klýby alǵa qoıǵan maqsattarǵa jete almady: Qazaqstan Kýbogy úshin kúreste jeńilip, Ulttyq lıgada chempıondyq ataqqa qol jetkize almady.
«Ótken jyly sportty qarjylandyrý tıimdiligin arttyrýdy kózdeıtin Zań qabyldandy. Onyń negizgi erejeleri ulttyq qurama komandalardy basym damytýǵa, sporttyq rezerv qalyptastyrýǵa, sondaı-aq búdjet qarajaty esebinen legıonerlerdi qarjylandyrýǵa tyıym salýǵa baǵyttalǵan. Qalyptasqan jaǵdaıda otandyq basketboldy damytý tásilderin qaıta qaraý múmkindigi qarastyrylýda. Basymdyq jastar komandasyn damytýǵa, sporttyq rezerv daıyndaýǵa jáne balalar men jasóspirimder sportyn qoldaýǵa beriledi», — dep atap ótti uıymda.
Buǵan deıin elordalyq komanda men Qazaqstan ulttyq quramasynyń oıynshylary el Prezıdenti Qasym-Jomart Toqaev pen sport mınıstrine beıneúndeý jazǵan bolatyn. Sportshylar negizgi quramnyń taratylýy olardy jumystan aıyryp, kópshiligin kásibı mansabyn aıaqtaýǵa májbúrleıtinin atap ótti. Oıynshylar klýbqa kem degende Qazaqstan chempıonatyna qatysý úshin qarjylandyrýdy saqtaýdy surady.
«Bizge kásibı deńgeıde óner kórsetýge múmkindik bere alatyn basqa komandalardyń bolmaýyna baılanysty, mansabymyzdy jalǵastyratyn jerimiz joq. Bul sheshimniń qabyldanýy 12 kásibı basketbolshynyń mansabyn aıaqtaýǵa májbúrleıdi, al Qazaqstan ulttyq quramasy kóp jyldar boıy halyqaralyq arenada elimizdiń namysyn qorǵap kele jatqan oıynshylardan aıyrylady. Eger «Astana» PBK Qazaqstan chempıonatyna qatysýdy saqtap qalsa, bizde elimizde basketboldy damytý, óz klýbtarymyz ben ulttyq quramanyń namysyn qorǵaý múmkindigi qalady. «Astananyń» negizgi komandasynyń joıylýy búkil qazaqstandyq basketbolǵa aýyr soqqy bolady. Bul jas oıynshylardyń damýyna qaýip tóndiredi, ulttyq chempıonatty álsiretedi, ulttyq quramaǵa oıynshylar daıyndaý júıesin buzady jáne sport túrimizdiń bolashaǵyna úlken zıan keltiredi. Sondaı-aq, biz barlyq jankúıerlerimizge osy qıyn jaǵdaıda bizdi qoldap, qoǵam nazaryn osy máselege aýdarýǵa kómektesý ótinishimen júginemiz. Sizderdiń qoldaýlaryńyz búgin erekshe mańyzdy», — delingen oıynshylardyń úndeýinde.