Astanada sot BMW júrgizýshisin 15 táýlikke qamady. Ol úsh aı ishinde Jol qozǵalysy erejelerin 87 ret buzǵan, onyń ishinde birneshe ret jyldamdyqty asyrǵan, dep habarlaıdy infohub.kz saıty.
29 jastaǵy BMW kóliginiń júrgizýshisi «Qaýipsiz jol» jedel-profılaktıkalyq is-sharasy barysynda ákimshilik jaýapkershilikke tartyldy. Astana polısıa departamentiniń málimetinshe, ol bıylǵy naýryzdan maýsymǵa deıin 87 ákimshilik quqyq buzýshylyq jasaǵan.
Onyń 55 jaǵdaıynda kameralar belgilengen jyldamdyqtyń asyrylǵanyn tirkese, 32 ret kólik marshrýttyq kólikterge arnalǵan jolaqpen júrgen. Polısıa mysaldar keltirdi: naýryzda Turan dańǵyly men Aqmeshit kóshesinde kólik jyldamdyǵy 129-131 km/saǵ jetken. Maýsymda Ǵ.Mustafın kóshesinde jyldamdyq 126 km/saǵ, al K.Muhamedhanov kóshesinde ruqsat etilgen 60 km/saǵ kezinde 151 km/saǵ bolǵan.
«Júıeli túrde quqyq buzýshylyq jasap, qoǵamǵa ashyq túrde qurmetsizdik tanytqany úshin polısıa qyzmetkerleri buzýshyny usaq buzaqylyq faktisi boıynsha ákimshilik jaýapkershilikke tartty», — dep qosty polısıa departamenti. Sot sheshimimen er adam 15 táýlikke qamaldy.
Polısıa Jol qozǵalysy erejelerin júıeli túrde buzý, agressıvti júrgizý stıli jáne basqa jol qozǵalysyna qatysýshylarǵa qaýip tóndirý jazasyz qalmaıtynyn eskertti.