Qazaqstan astanasy «DDU ınovasıalyq qala — 2026» halyqaralyq syılyǵynyń 15 fınalısiniń qataryna kirdi. Bul týraly Qazaqstannyń Ádilet mınıstrligi Dúnıejúzilik zıatkerlik menshik uıymyna silteme jasap habarlady, dep jazady infohub.kz saıty.
Inovasıalyq jáne kreatıvti ekojúıe damytyp jatqan qalalarǵa arnalǵan bul syılyq alǵash ret berilip otyr. Halyqaralyq táýelsiz qazylar alqasy qalalar usynǵan bastamalardy, sondaı-aq olardy kelesi jyly júzege asyrý josparlaryn baǵalady.
Astananyń ótiniminde jasandy ıntellekt pen derekterdi taldaýdy qoldana otyryp, Smart City platformasyn damytý, jeke baǵyttalǵan memlekettik qyzmetter kórsetetin biryńǵaı sıfrlyq portal qurý, qalanyń ınovasıalyq ekojúıesin nyǵaıtý, sondaı-aq qalalyq ortanyń turaqtylyǵy men qoljetimdiligin arttyrý úshin tehnologıalardy paıdalaný qarastyrylǵan.
Ótinimder álemniń túkpir-túkpirinen túrli aýqymdaǵy qalalardan tústi. Astanamen birge fınalǵa Belgıa, Qytaı, Úndistan, Iordanıa, Marokko, Fılıppın, Portýgalıa, Reseı, Taıland jáne Ulybrıtanıa qalalary ótti.
Syılyqtyń úsh jeńimpazy 2026 jylǵy 12 qazanda Jenevadaǵy DDU shtab-páterinde jarıalanady. Saltanat BUU merler forýmynyń altynshy kezdesýi aıasynda ótedi.
Buǵan deıin «Kýrsıv» jazǵandaı, Astana Global Cities Index 2026 reıtıńinde álemniń 1 myń iri qalasynyń ishinde 281-orynǵa turaqtap, bir jylda bes satyǵa tómendegen. Sonymen qatar astana adamı kapıtal deńgeıi boıynsha 98-orynda, ekonomıkalyq kórsetkishter boıynsha 264-orynda tur.