Jaz aıaqtalyp qaldy, biraq Astana áli de týrıserdi ártúrli demalys túrlerimen qýantady. NUR.KZ astana qonaqtaryna sýyq mezgilge qaldyrmaǵan jón demalys nusqalaryn usynady, dep habarlaıdy infohub.kz saıty.
Ekskýrsıa — jaǵymdyny paıdalymen ushtastyrýdyń tamasha múmkindigi. Zamanaýı Astanada týrısiń nazaryn aýdararlyq kórikti jerler men qyzyqty oryndar óte kóp — tarıhı oń jaǵalaýda da, salystyrmaly túrde jas sol jaǵalaýda da. Visit Astana portaly elordanyń oryndary men nysandary boıynsha 20-dan astam túrli ekskýrsıa usynady. Ataqty qyzyl eki qabatty avtobýspen saıahat, Esil boıymen sý saıahaty, jaıaý sıtı-týr nemese keshki qalamen serýen: árkim Astanamen tanysýdyń ózine laıyqty tásilin taba alady.
Megapolıste astana turǵyndary men qonaqtary taza aýada demalystan lázzat alatyn oryndar jetkilikti. Qyrqylǵan kógaldar, kóleńkeli aǵashtar, tynyshtyq pen tabıǵatpen birlik olardy Birinshi Prezıdent saıabaǵynda, Botanıkalyq baqta, «Jetisý» saıabaǵynda, Baýyrjan Momyshuly atyndaǵy saıabaqta jáne basqa da kóptegen elordalyq jasyl aımaqtarda kútip tur. Ashyq aspan astynda demalǵanda saıabaq aýmaǵynda ot jaǵýǵa qatań tyıym salynǵanyn este ustaǵan jón. Sondaı-aq аlkogóldik ishimdikter ishýge jáne ózińnen keıin qoqys qaldyrýǵa bolmaıdy.
13 tamyzda LM Kulanshi Art (K. Amanjolova kósh., 22A) galereıasynda álemge áıgili sýretshi Mark Shagaldyń jumystarynyń kórmesi bastaldy. Elordada alǵash ret moıyndalǵan keskindeme sheberiniń túpnusqa grafıkasy usynyldy. Ekspozısıanyń negizgi ornyn Mark Shagal HH ǵasyrdyń 30-jyldarynda jasaı bastaǵan grafıkalyq sıkl alady. Sondaı-aq elordaǵa biregeı kórmede sýretshiniń «Ierýsalım terezeleri» sıklinen 24 jumysy usynylǵan. Bul sıkl Shagaldyń Ierýsalımdegi sınagogalardyń birine jasaǵan monýmentaldy vıtrajdarymen baılanysty.
Elordalyq sholý dóńgelegi — Astananyń eń kórnekti oryndarynyń biri, onyń arqasynda qalany qus ushqan bıiktikten kórýge bolady. Ol KeruenCity saýda ortalyǵynyń qarama-qarsysynda ornalasqan. Nysan búkil Qazaqstandaǵy óz túrindegi eń úlkeni bolýymen qyzyqty. Onyń bıiktigi 65 metrdi quraıdy. Sholý dóńgelegi panoramalyq kórinisi bar 35 jaıly kabınamen jabdyqtalǵan. Atraksıonnyń eń bıik núktesinen Astananyń sulýlyǵyn, aýqymyn jáne biregeı sáýlettik ártúrliligin baǵalaýǵa bolady. Jeldi jáne sýyq kúnderi dóńgelek jumys istemeýi múmkin, sondyqtan jazdyń ashyq kúni — oǵan minýge tamasha ýaqyt.
Qatarynan ekinshi jyl qala ákimdiginiń qoldaýymen Astanada barlyq tilek bildirýshiler qatysa alatyn tegin ıoga sabaqtary uıymdastyrylýda. Jattyǵýlar aptasyna úsh ret (dúısenbi, sársenbi, juma) saǵat 19:00-de qalanyń alty núktesinde — «Jetisý», «Samal», «Jeruıyq», «Ortalyq», Atatúrik atyndaǵy jáne «Prezıdenttik» saıabaqtarynda ótedi. Ioga sabaqtaryna qatysýshylardy paıdaly tájirıbe, kúsh-qýat zarády, dostyq atmosfera jáne tájirıbeli mamandardyń keńesteri kútip tur.