Astanada Mercedes-Benz kóligin aıdaǵan júrgizýshi qala jolynda qaýipti manevrler jasaǵany úshin ákimshilik qamaýǵa alyndy. Bul sheshimdi ákimshilik quqyq buzýshylyqtar jónindegi mamandandyrylǵan aýdanaralyq sot shyǵardy, dep habarlaıdy infohub.kz saıty.
Astana sottarynyń Telegram-arnasynda málim etkendeı, quqyq buzýshylyq 30 qyrkúıekte anyqtalǵan. Mercedes-Benz júrgizýshisi Jumabaev kóshesimen qıylysta drıft jasaǵan: kóliktiń artqy bóligin ádeıi syrǵyta otyryp, qaýipti manevrlerdi kórsetip oryndaǵan.
Búgin Astananyń ákimshilik quqyq buzýshylyqtar jónindegi mamandandyrylǵan aýdanaralyq soty bul isti Ákimshilik quqyq buzýshylyq týraly kodekstiń 434-babynyń 1-bóligi boıynsha qarady. Atalǵan baptyń sanksıasy 20-dan 60 saǵatqa deıingi qoǵamdyq jumystardy ne 5-ten 10 táýlikke deıingi ákimshilik qamaýdy kózdeıdi. Sot otyrysynda aıyptalýshy kinásin tolyq moıyndady.
«Jaza taǵaıyndaý kezinde sot jasalǵan quqyq buzýshylyqtyń sıpaty men qoǵamdyq qaýiptilik dárejesin, onyń ádeıi, jarıa jáne kórsetip jasalǵan sıpatyn eskerdi. Quqyqqa qaıshy minez-qulyq jol júrisi qaǵıdalarynyń talaptaryn óreskel buzýmen qatar júrip, jol qozǵalysyna qatysýshylardyń qaýipsizdigine qater tóndirdi. Mán-jaılardyń jıyntyǵyn eskere otyryp, sot 10 táýlikke ákimshilik qamaý túrindegi ákimshilik jaza taǵaıyndaý qajet degen qorytyndyǵa keldi», — delingen habarlamada.
Qaýly zańdy kúshine engen joq.