Astanada qaýipti júrgizýdi ádetke aınaldyrǵan júrgizýshi ákimshilik qamaýǵa alyndy: Mercedes-Benz kóligin turǵyn úılerdiń dál qasynda drıftke salǵan júrgizýshi osylaısha on táýlikke bostandyǵynan aıyryldy. İske elordalyq prokýratýra men polısıa aralasty, dep habarlaıdy infohub.kz saıty.
Quqyq qorǵaý organdary kólik júrgizýshisiniń áreketin qoǵamdyq tártipti ádeıi buzý jáne adamdarǵa qaýip tóndirý dep baǵalady.
«Turǵyn úılerdiń qasynda kóliktiń artqy bóligin syrǵytyp, drıft jasap, qaýipti manevrler jasaǵan «Mercedes-Benz» júrgizýshisi aınalasyndaǵylarǵa qaýip tóndirdi», — delingen habarlamada.
Buzýshylyq Ákimshilik quqyq buzýshylyq týraly kodekstiń 434-baby — usaq buzaqylyq boıynsha tirkeldi. Aýladaǵy drıft júrginshilerge naqty qaýip tóndirgendikten, sot jaı ǵana aıyppulmen shektelmeı, buzýshyǵa on táýlik qamaý jazasyn taǵaıyndady.
Prokýratýra endi polısıamen birlesip osyndaı júrgizýshilerdi turaqty túrde anyqtap, jazalaıtynyn atap ótti. Basty maqsat — qaýipti júrgizý úshin jaýapkershilikten qutylý múmkin emesin kórsetý. Júrgizýshilerdi jol júrý erejelerin saqtaýǵa jáne ózgeniń ómirin qaterge tikpeýge shaqyrdy.
Buǵan deıin «Kýrsıv» bıylǵy segiz aıda respýblıkada 21,4 myń jol-kólik oqıǵasy bolǵanyn, bul ótken jylmen salystyrǵanda 5%-ǵa az ekenin jazǵan. Ólim-jitim 15%-ǵa qysqaryp, apat qurbandary 1230 adamdy qurady (bir jyl buryn 1400 edi).
Oń úrdis eldiń barlyq derlik óńirinde baıqalady. Máselen, 20 óńirdiń 17-sinde apat sany azaıdy. Jol-kólik oqıǵalarynyń sany eń kóp qysqarǵan aımaqtar — Ulytaý, Abaı jáne Mańǵystaý oblystary. Al joldaǵy ólim-jitimniń eń aıtarlyqtaı azaıýy Shyǵys Qazaqstan, Almaty jáne Atyraý oblystarynda tirkeldi.