Астанада 25 жастағы Toyota жүргізушысы әлеуметтік желідегі контент үшін жолда қауіпті дрифт жасап, 10 тәулікке әкімшілік қамауға алынды, деп хабарлайды infohub.kz сайты.
NUR.KZ-тің Астана қаласы полиция департаментіне сілтеме жасап хабарлауынша, жас жігіт жолда қауіпті дрифт жасағаны үшін ұсталған. Ол басқа жол қозғалысына қатысушыларға қауіп төндіретін қауіпті маневрлер жасаған.
«Ер адамның әлеуметтік желілерге контент жасап, қаралым санын арттыру мақсатында қауіпті маневрлер жасағаны, сол арқылы айналасындағылардың қауіпсіздігіне қауіп төндіргені анықталды. Жүргізушіге қатысты маневрлеу ережелерін бұзу, жолдарды бүлдіру, көлік құралдарын пайдалану ережелерін бұзу, сондай-ақ ұсақ бұзақылық фактілері бойынша әкімшілік материалдар толтырылды», — делінген полиция хабарламасында.
Құқық қорғау органдарының дерегінше, сот шешімімен ер адам 10 тәулікке әкімшілік қамауға алынды, ал оның көлігі коммуналдық тұраққа жіберілді.
Бұған дейін Астанада түнде жолда дрифт жасаған жүргізуші жауапкершілікке тартылғаны хабарланған болатын.