Astanada Astana kúni qarsańynda ótken dron-shoýdy uıymdastyrýshyǵa ákimshilik jaýapkershilik qoldanylýy múmkin. Ákimdiktiń málimdeýinshe, shara olarmen kelisilmegen, dep habarlaıdy infohub.kz.
Astana ákimdigi 5 shildede ótken dron-shoý uıymdastyrýshysynyń kórermendik is-sharalardy ótkizý tártibin buzǵan bolýy múmkin ekenin málimdedi. Osy fakti boıynsha tekserý bastaldy.
Qalalyq ákimdik ushqyshsyz ushý apparattary qoldanylǵan shoýdyń Astana kúnin merekeleýdiń resmı baǵdarlamasyna kirmegenin jáne jergilikti atqarýshy organdar uıymdastyrmaǵanyn atap ótti.
«Astana qalasynyń ákimdigine dron-shoýdy uıymdastyrý jáne ótkizý týraly habarlama jiberilmegen. Osyǵan baılanysty Astana qalasynyń ákimdigi atalǵan sharany kelisý, uıymdastyrý ne ótkizý týraly sheshim qabyldamaǵan. Astana qalasynyń ákimdigi men atalǵan sharany uıymdastyrýshylar arasynda sharttar, kelisimder, memorandýmdar nemese ózge qujattar jasalmaǵan», — delingen ákimdik jaýabynda.
Vedomstvo uıymdastyrýshy is-sharaǵa deıin kúntizbelik on kúnnen keshiktirmeı jazbasha habarlama jiberýge, sondaı-aq baǵdarlama, reglament jáne senarı usynýǵa mindetti ekenin eske saldy.
Ákimdiktiń dereginshe, uıymdastyrýshynyń áreketterinen ÁQBtK-niń 488-1-babynda kózdelgen ákimshilik quqyq buzýshylyq belgileri baıqalady.
«Qazirgi ýaqytta atalǵan fakti boıynsha tekserý júrgizilýde, onyń nátıjeleri boıynsha Qazaqstan Respýblıkasynyń zańnamasynda belgilengen tártippen tıisti sheshim qabyldanady», — dep habarlady ákimdikte.
Sondaı-aq bılik shoýdy ótkizý mán-jaıyn zerttep, onyń josyqsyz nemese jasyryn jarnama belgilerin, sondaı-aq jarnama týraly zańnamanyń basqa da yqtımal buzýshylyqtaryn qamtyǵan-qamtymaǵanyn tekseredi.
Eske salaıyq, dron-shoý 5 shildede ótken bolatyn. Sharadan keıin elorda turǵyndary men qonaqtary áleýmettik jelilerde ony synǵa alyp, qysqa baǵdarlama men kóp jarnamaǵa nazar aýdardy. Keıin Aspan Galaxy kompanıasy shoýdyń Qazaqstandaǵy Enrıke Iglesıastyń aldaǵy konsertterine arnalǵanyn jáne qajetti kelisimder alynǵannan keıin ótkizilgenin málimdedi. Alaıda ákimdik bul aqparatty joqqa shyǵardy.