Qazaqstan astanasynda ekinshi áýejaı paıda bolady: ony Sıngapýrdyń memlekettik kompanıasy turǵyzady. Qurylys 2027 jyly bastalady, tıisti ramalyq kelisimge qol qoıyldy, dep habarlaıdy infohub.kz saıty.
Kólik mınıstrliginiń málimetinshe, qujat Changi Airport Group enshiles qurylymy — Changi Airports International (CAI) kompanıasymen jasaldy. Kelisim astananyń áýejaı ınfraqurylymyn damytýǵa qatysty.
«Taraptar Astana qalasynda jańa áýejaı salý jobasyn iske asyrý boıynsha yntymaqtastyq týraly ýaǵdalasty. Joba Qazaqstan Respýblıkasy Prezıdenti Qasym-Jomart Toqaevtyń halyqaralyq avıasıalyq hab qalyptastyrý jáne Astananyń tranzıttik áleýetin damytý jónindegi tapsyrmasyn oryndaý aıasynda júzege asyrylýda», — delingen vedomstvo habarlamasynda.
Jańa nysannan bólek, taraptar Changi Airports International kompanıasymen qoldanystaǵy Astana halyqaralyq áýejaıy boıynsha ózara is-qımyl jasasýǵa kelisti. Áńgime kompanıanyń menedjmentke, operasıalyq qyzmetke (O&M) jáne áýejaıdy odan ári damytýdyń ózge de baǵyttaryna qatysýy týraly bolyp otyr.
Changi Airport Group (CAG) — Sıngapýrdyń memlekettik kompanıasy, ol eldiń áýejaı ınfraqurylymyn, sonyń ishinde Changi halyqaralyq áýejaıyn basqarýǵa jáne damytýǵa jaýapty. Bul áýejaı álemniń jetekshi halyqaralyq avıasıalyq habtarynyń qataryna kiredi. 2025 jyly ol shamamen 70 mln jolaýshy men 2 mln tonnadan astam júkti qabyldap, Sıngapýrdy álemniń 170-ten astam qalasymen baılanystyrdy. Sonymen qatar Changi Skytrax World Airport Awards nusqasy boıynsha 14 ret «Álemniń úzdik áýejaıy» ataǵyn jeńip aldy, onyń ishinde 2025 jáne 2026 jyldary da.
Eske salaıyq, ótken jazda Qasym-Jomart Toqaev Astanada ekinshi áýejaıdyń jaqyn arada salynatynyn jarıalaǵan bolatyn.