Qazaqstan astanasynda jol-kólik oqıǵasy bolyp, saldarynan elektrosamokat tizginindegi kámeletke tolmaǵan jasóspirim zardap shekti, dep habarlaıdy infohub.kz.
Oqıǵa keshe, 13 tamyzda bolǵan. HALYQSTAN Telegram-arnasynda jarıalanǵan kýágerlerdiń aıtýynsha, úsh jasóspirim samokattarymen qoǵamdyq kólikke arnalǵan jolaqpen kele jatqan qozǵalysqa qarsy baǵytta júrip kele jatqan. Avtobýs aıaldamaǵa kire bastaǵanda, eki jigit onymen jıek arasynan ótip úlgergen, al úshinshisi manevr jasaı almaı, kólik dóńgeleginiń astynda qalǵan. Soqtyǵysý saldarynan samokat avtobýstyń astynda qalyp, kóliktiń aldyńǵy áınegi synǵan.
Astana polısıa departamentiniń baspasóz qyzmeti JKO faktisin rastap, mán-jaıdy naqtylady. Yutong markaly marshrýttyq avtobýstyń júrgizýshisi Túrkistan kóshesimen kele jatyp, aıaldama keshenine kirý kezinde qoǵamdyq kólikke arnalǵan jolaqpen qarsy baǵytta samokatpen kele jatqan jasóspirimdi qaǵyp ketken.
Zardap shekken adam medısınalyq mekemege jetkizilip, dárigerler teksergennen keıin ambýlatorıalyq emdeýge jiberildi. Qazirgi ýaqytta polısıa bul fakti boıynsha tekserý júrgizýde.