Elordada Esil ózenin tazartý jáne ekologıalyq qalpyna keltirý jumystary kúsheıtildi. Astana ákimdiginiń málimetinshe, bıyl jekelegen ýchaskelerde sýdyń gúldený qarqyndylyǵy anomaldy ystyq pen sý deńgeıiniń tómendeýine baılanysty kópjyldyq kórsetkishterden asyp tústi, dep habarlaıdy infohub.kz.
Ózenniń jaı-kúıine syrtqy faktorlar da áser etedi: sý sapasy joǵarǵy aımaqtardaǵy jaǵdaıyna baılanysty. Qosymsha júktemeni bıogendi zattar — azot pen fosfor qosylystary, sondaı-aq organıkalyq lastanýlar týdyrady. Sarapshylar ózenge jáne onyń salalary — Sarybulaq pen Aqbulaq bulaqtaryna ruqsatsyz aǵyndylardyń túsý yqtımaldyǵyn joqqa shyǵarmaıdy. Munyń bári kók-jasyl baldyrlardyń belsendi damýyna yqpal etedi.
Aǵyny álsiz tuıyq ýchaskelerde gúldenýmen kúresý úshin jasyl mıkrobaldyr — hlorella sýspenzıasyn qoldaný josparlanýda. Ákimdikte bul ádis ekologıalyq qaýipsiz jáne hımıalyq zattarǵa balama ekenin atap ótti. Hlorella kók-jasyl baldyrlardyń kóbeıýine yqpal etetin azot pen fosfor qosylystaryn belsendi túrde sińirip, olardyń damýyn tejep, sý qoımasynyń tabıǵı bıologıalyq tepe-teńdigin qalpyna keltiredi. Fotosıntez prosesinde ol sýdy ottegimen baıytyp, balyqtar men basqa sý aǵzalary úshin qolaıly jaǵdaı jasaıdy, sondaı-aq tabıǵı ózin-ózi tazartý prosesterine yqpal etedi.
Ekologtar hlorellany qoldanýdyń áseri birtindep bolatynyn atap ótedi: bıologıalyq tepe-teńdikti qalpyna keltirý ýaqytty qajet etedi, al alǵashqy nátıjeler sýspenzıa engizilgennen keıin birneshe aptadan soń kútiledi.
Buǵan deıin áleýmettik jelilerde «Tulpar» kópiriniń mańyndaǵy sýda ashyq-jasyl jabyndy beınelengen foto jáne vıdeo paıda bolyp, qala turǵyndarynyń alańdaýshylyǵyn týdyrǵan edi. Qalalyq qorshaǵan ortany qorǵaý jáne tabıǵat paıdalaný basqarmasy mamandar ekologıa departamentimen birlesip ýchaskeni tekserip, zerthanalyq zertteýler úshin sý synamalaryn alǵanyn habarlady. Onda jekelegen ýchaskelerde joǵary aýa temperatýrasy, aǵynnyń tómen jyldamdyǵy jáne qolaıly gıdrometeorologıalyq jaǵdaılar kezinde fıtoplanktonnyń (sıanobakterıalardyń) qarqyndy damýynan týyndaǵan maýsymdyq qubylys — sýdyń gúldenýi baıqalatyny túsindirildi.