Astanada gashısh maıyn zańsyz aınalymǵa túsirdi degen kúdikpen eki er adam ustaldy. Tintý kezinde 1,5 keliden astam esirtki tárkilenip, negizgi dálel retinde qarapaıym mantovarka alyndy. Ony zatty balqytý úshin paıdalanǵan, dep habarlaıdy infohub.kz.
Polısıa málimetinshe, 24 jáne 23 jastaǵy elorda turǵyndary bir kireberistegi eki túrli qabattaǵy páterdi jaldaǵan. Tergeý nusqasy boıynsha, olar birlesip áreket etip, ınternet-messendjerler arqyly esirtki taratyp, jasyryn oryndar uıymdastyrǵan.
«Tintý kezinde eki páterden de sary tústi suıyq konsıstensıaly gashısh maıy, elektrondy tarazy, oraý materıaldary jáne esirtki salynǵan ydystar tabyldy», — delingen polısıa habarlamasynda.
Sonymen qatar, páterlerdiń biriniń as úıinen esirtki qaldyqtary jabysqan mantovarka alyndy. Tergeý dereginshe, kúdiktiler gashısh maıyn bólshektep, odan ári taratý úshin osy qurylǵyda balqytqan. Barlyǵy polısıa 1,5 keliden astam gashısh maıy men marıhýanany tárkiledi.
«Osy fakti boıynsha qylmystyq is qozǵaldy. Kúdiktiler ustalyp, ýaqytsha ustaý ızolátoryna qamaldy», — dep qosty polısıada. Vedomstvo esirtki saqtaý men taratýdyń qylmystyq jaýapkershiligin eskertip, turǵyndardy osyndaı derekterdi habarlaýǵa shaqyrdy.