Qazaqstan astanasynda sheteldik ónimderge, erekshe taýarlarǵa jáne óz asqanasyna baǵyttalǵan «Gastronom» sýpermarketi ashyldy. Alaıda saýda núktesiniń tusaýkeseri Astana turǵyndarynyń bir bóliginde qýanysh emes, narazylyq týdyrdy, dep habarlaıdy infohub.kz saıty.
Dúkende Eýropa, Azıa jáne AQSH-tan ákelingen ımporttyq ónimderdiń keń assortımenti usynylǵan. Olardyń qatarynda sırek kezdesetin táttiler, sheteldik jarmalar, glútensiz ónimder, ósimdik súti, qantsyz taýarlar, erekshe tuzdyqtar men sıroptar bar.
Sonymen qatar, assortımentte ártúrli elderden ákelingen ekzotıkalyq jemister men kókónister bar. Dúken qarapaıym sýpermarketterde jıi kezdespeıtin «sırek» ónimderge basymdyq berip otyrǵan sıaqty.
Biraq astanalyqtardyń bári bul ashylýdy qýanyshpen qarsy alǵan joq. Jarıalanym astyndaǵy pikirlerde qala turǵyndarynyń bir bóligi kóptegen ımporttyq ónimderdiń ornyna qoljetimdi baǵadaǵy otandyq taýarlardy kóbirek kórgisi keletinin jetkizdi.
«Ózimizdikin óndirý kerek, jergilikti ónim paıdaly ári dámdi», «Biz Amerıkadan Qazaqstanda naǵyz kókónis, jemis jeý úshin kelemiz. Óz fermerlerimizdi qoldaý kerek», «Al óz makaronymyz bizde 100 ese jaqsy», «Ferma ashsańdar, sıyr, qoı t.b. Qazir et qymbat», – dep jazady pikirlerde.
Keıbir paıdalanýshylar baǵaǵa bólek toqtalyp, mundaı ımporttyq ónimder qazaqstandyqtarǵa qoljetimdi bola ma, tipti qajet pe degen kúmán bildirdi.
Buǵan deıin «Kýrsıv» qazaqstandyqtar otandyq óndiris ónimderin satyp alýǵa daıyn ekenin, alaıda sol nemese basqa taýarlardyń qaı elde óndirilgenin bile bermeıtinin jazǵan. Atap aıtqanda, bul qazaqstandyq saýda jelilerinde usynylǵan irimshikterge jasalǵan zertteýde kórindi.