Elordada ekologıalyq ahýaldy jaqsartý jumystary jalǵasýda: Baıqońyr aýdanyndaǵy «Ońdiris» turǵyn alaby tolyq gazdandyrylady. Bul shamamen 40 myń adam turatyn jeke sektorda kómir qoldanýdan bas tartýǵa múmkindik beredi, dep habarlaıdy infohub.kz.
Máslıhat komısıasynyń otyrysynda Astana qalasy Energetıka basqarmasynyń basshysy Ádil Qanatov máseleler men olardy sheshý joldary týraly aıtty. Ol alaptyń tyǵyz jeke qurylysy qys mezgilinde elorda ekojúıesine keri áserin tıgizetinin atap ótti. «„Ońdiris“ turǵyn alabynyń jeke sektorynda qys mezgilinde jylytý negizinen kómirmen júzege asyrylady, bul qorshaǵan ortaǵa teris áser etip, Baıqońyr aýdanynda jáne tutastaı qalada atmosferaǵa lastaýshy zattar shyǵaryndylarynyń artýyna yqpal etedi. Sonymen qatar, qoldanystaǵy ortalyq jylýmen jabdyqtaý júıesi JEO-1, JEO-2, JEO-3 kózderinde qajetti bos qýattarǵa ıe emes», — dedi Ádil Qanatov.
Halyqty qoldanystaǵy radıaldy jylý jelilerine qajetti kólemde qosý múmkin emes. Osyny eskere otyryp, turǵyn alabyn keshendi gazdandyrý jalǵyz ońtaıly sheshim bolyp tabylady.
Joba aıasynda 2 120 áleýetti abonentti qosý múmkindigi bar gaz taratý ınfraqurylymyn qurý josparlanýda. Jobada jalpy uzyndyǵy shamamen 185 shaqyrym, ótkizý qabileti saǵatyna 20 myń tekshe metrge deıin gaz taratý jelilerin salý kózdelgen. Infraqurylym alaptyń shamamen 85 kóshesin qamtıdy.
Jobany «kiltin tapsyrý» qaǵıdaty boıynsha júzege asyrý usynylady, ıaǵnı biryńǵaı merdiger jobalaý men jabdyq satyp alýdan bastap qurylys pen paıdalanýǵa berýge deıingi barlyq jumys keshenin oryndaıdy. «Atalǵan úlgi boıynsha jobany iske asyrý jumystyń barlyq kezeńderin biryńǵaı basqarýdy qamtamasyz etýge, qurylys merzimderin qysqartýǵa, joba qunynyń ósý táýekelderin barynsha azaıtýǵa jáne kózdelgen jobalyq kórsetkishterge qol jetkizý úshin jaýapkershilikti bekitýge múmkindik beredi», — dep atap ótti basqarma basshysy.
Depýtattarmen talqylaý barysynda jumystar tolyǵymen búdjet qarajaty esebinen qarjylandyrylatyny rastaldy, sondyqtan turǵyndar úshin gaz tarıfi kóterilmeıdi. Jumystar birneshe kezeńge bólingen. Bıylǵy jyly ekinshi, úshinshi, tórtinshi, besinshi jáne altynshy iske qosý keshenderin aıaqtaý josparlansa, qalǵandary kelesi jylǵa aýystyrylady. «Ońdiris» alabyn gazdandyrýdy aıaqtaý elordaǵa josparlanǵan turǵyn alaptardy gazdandyrýdyń júz paıyzdyq kórsetkishine shyǵýǵa múmkindik beredi.