Qazaqstan astanasynda tenderlik jobalarǵa ınvestısıa salý atyn jamylyp, birneshe ret alaıaqtyq jasady degen kúdikke ilingen 32 jastaǵy er adam ustaldy. Onyń is-áreketinen keltirilgen shyǵyn shamamen 35 mıllıon teńgeni quraıdy, 11 adam zardap shekti, dep habarlaıdy infohub.kz saıty.
Tergeý derekteri boıynsha, kúdikti TikTok jáne Threads áleýmettik jelilerinde joǵary tabysty ınvestısıalar týraly habarlandyrýlar ornalastyrǵan. Qyzyǵýshylyq tanytqan paıdalanýshylarǵa ol beıneqońyraýlar kezinde aqsha salýdy usynyp, resmı yntymaqtastyq pen tez paıda tabýdy ýáde etken.
Senimdilik úshin kúdikti klıenttermen notarıaldy kýálandyrylǵan kelisimsharttar jasasqan. Alaıda, iri somalardy alǵan soń, ol óz mindettemelerin oryndamaı, aqshany óz qalaýynsha jumsaǵan.
Qazirgi ýaqytta kúdikti ýaqytsha ustaý ızolátoryna qamalǵan. Polısıa sotqa deıingi tergeý júrgizip, onyń basqa da osyǵan uqsas qylmystarǵa qatysy bar-joǵyn tekseredi.
Vedomstvo azamattardy saq bolýǵa shaqyrdy: ınvestısıalyq jobalar týraly aqparatty tekserýge, kepildik berilgen joǵary tabys ýádelerine senbeýge jáne beıtanys adamdarǵa aqsha aýdarmaýǵa keńes berdi.
Buǵan deıin alaıaqtar jalǵan ınvestısıalyq platformalardy paıdalanyp, aldymen shaǵyn somany alýǵa ruqsat beretini habarlanǵan bolatyn. Osydan keıin jábirlenýshini salymdy ulǵaıtýǵa kóndiredi, al úlken somany alýǵa tyrysqanda salyq, komısıa nemese saqtandyrý tóleýdi talap etedi. Ulttyq bankte retteýshi qyzmetkerleri azamattarǵa ınvestısıalyq ónimderdi usynbaıtynyn jáne halyqpen esep aıyrysý júrgizbeıtinin eske saldy.