Astanada tegin JOLTAP kýrstaryn bitirgenderdiń 60%-y jumysqa ornalasty. Bul týraly elorda ákimi Jeńis Qasymbek Instagram-da málimdedi, dep habarlaıdy infohub.kz saıty.
«Úsh jyl buryn biz azamattarǵa jańa kásipti tegin meńgerýge, óz isin ashýǵa, jumys tabýǵa jáne memlekettik qoldaý sharalary boıynsha keńes alýǵa múmkindik beretin JOLTAP jobasyn bastaǵan edik», — dep jazdy Qasymbek.
Úsh jyl ishinde tigin isi, dánekerleý, SMM jáne basqa da baǵyttar boıynsha 22 myń adam oqydy. Taǵy 17% túlek frılanspen aınalysady, al 2 myńǵa jýyq adam shaǵyn kásip ashty.
Joba úshin 30 baǵdarlama ázirlendi. Onyń 19-y jumysshy mamandyqtaryna arnalǵan: tiginshi, naýbaıshy, elektrgazdánekerleýshi, aıaq kıim jóndeýshi jáne jıhaz jınaýshy mamandyqtary bar. Taǵy 11 baǵyt sıfrlyq daǵdylarǵa — SMM, targettelgen jarnama, grafıkalyq dızaın jáne mobılografıaǵa arnalǵan.
«Sıfrlyq kýrstardyń mańyzdy ereksheligi — jasandy ıntellekt quraldarynyń engizilýi», — dep atap ótti Qasymbek.
Oqý tegin. Jazylýǵa «Barshaǵa múmkindik» mobıldi pýnktterinde, aýdandyq ákimdikterde jáne Astananyń jumyspen qamtý basqarmasynyń mansap ortalyqtarynda bolady.
Prezıdenttiń tapsyrmasy boıynsha joba endi elimizdiń barlyq óńirine taratylady.
Buǵan deıin Eńbek mınıstrligi eldegi eń suranysqa ıe mamandyqtardy ataǵan bolatyn. Vedomstvo dereginshe, Qazaqstandaǵy bos oryndardyń 42%-ǵa jýyǵy bilikti jumysshy mamandyqtaryna, qyzmet kórsetý salasyna jáne aýyl sharýashylyǵyna tıesili.