Qostanaıda jaýapkerler jol-kólik oqıǵasynda zardap shekken kámeletke tolmaǵanǵa moraldyq zıan úshin 5 mıllıon teńge tóleýge erikti túrde kelisti, dep habarlaıdy infohub.kz saıty.
Qostanaı oblysy sottarynyń resmı Telegram-arnasynda habarlanǵandaı, Qostanaı qalalyq soty áıeldiń kámeletke tolmaǵan balasynyń múddesine eki jaýapkershiligi shekteýli seriktestikke qarsy zalaldy óteý jáne moraldyq zıandy óteý týraly talap aryzy boıynsha azamattyq isti qarady.
İs materıaldaryna sáıkes, 2026 jyldyń mamyr aıynda Astana – Qaraǵandy tas jolynda júk jáne jeńil kólikterdiń qatysýymen jol-kólik oqıǵasy bolǵan. Saldarynan jeńil kólikte bolǵan kámeletke tolmaǵan balanyń densaýlyǵyna aýyr zıan keltirilgen.
Alǵan jaraqattaryna baılanysty ol stasıonarlyq emnen ótip, neırohırýrgıalyq operasıa jasatqan.
JKO-ǵa baılanysty talapker moraldyq zıandy óteý, sondaı-aq zańgerlik qyzmetterge aqy tóleý shyǵyndaryn óndirip alý týraly talaptar qoıǵan.
Sot otyrysy barysynda taraptar daýdy medıasıa tártibimen retteý týraly kelisimge keldi. Kelisim sharttaryna sáıkes, jaýapkerler zardap shekkenge moraldyq zıan úshin 5 mıllıon teńge jáne zańgerlik qyzmetterdi tóleý úshin 300 myń teńge tóleýge mindettendi.
Sot medıatıvtik kelisimniń mazmunyn tekserip, onyń zańnama talaptaryna sáıkestigin anyqtap, ony bekitýge bolady degen qorytyndyǵa keldi. Daýdy medıasıa tártibimen retteý týraly kelisim sotpen bekitilip, azamattyq is boıynsha is júrgizý toqtatyldy.
Medıatıvtik kelisimniń sharttary sot ony bekitken sátten bastap kúshine enedi jáne taraptardyń oryndaýy úshin mindetti bolyp tabylady.