Astanada feldsher Uldana Myrzýannyń qazasyna qatysty sot otyrysynda qasbeti qulaǵan ǵımaratqa júrgizilgen tehnıkalyq saraptamanyń nátıjeleri jarıalandy, dep habarlaıdy infohub.kz saıty.
Memlekettik sáýlet-qurylys baqylaý basqarmasynyń ókili sot otyrysynda úıdiń kepildik merzimi aıaqtalǵanyn, sondyqtan oǵan qazirgi ýaqytta baqylaý júrgizilmeıtinin aıtty. Prokýror Nurdáýlet Ábýov 2017 jylǵy 3 qarashada júrgizilgen saraptama qorytyndysynan úzindiler oqydy.
Qujatqa sáıkes, tekserý barysynda qabyrǵalar men tereze betkeılerinde tik jáne kólbeý jaryqtar, sondaı-aq qasbettiń jekelegen ýchaskelerinde qabyrǵa kirpishteriniń bosańsýy men ishinara buzylýy, ǵımarattyń irgetas bóliginiń sokoldik árleýiniń qabyrshaqtanýy anyqtalǵan. Anyqtalǵan aqaýlar syrtqy qabyrǵalardyń árleýiniń fýnksıonaldyq jaramdylyǵyna keri áserin tıgizedi, sondyqtan búlingen árleý ýchaskelerin qalpyna keltirý qajet. Sarapshylar kirpish qalaýynyń árleýin qalpyna keltire otyryp, kúrdeli jóndeý júrgizý qajettigi týraly qorytyndyǵa kelgen. Syrtqy qabyrǵalardyń fızıkalyq tozýy 40 paıyzdy qurady.
Saraptamada sondaı-aq tekserýdiń ártúrli núkteleri boıynsha derekter kesteleri keltirilgen. Qabyrǵalarda jekelegen jaryqtar men oıyqtar bar ekeni, keı jerlerde jikterdiń jeldenýi, kirpish qalaýynyń bosańsýy, jekelegen kirpishterdiń túsip qalýy, karnızder men peremychkalarda jaryqtar, qabyrǵa betteriniń ylǵaldanýy baıqalǵany atap ótilgen.
Sarapshylardyń usynymdarynyń ishinde — jaryqtar paıda bolǵan jerlerdi nyǵaıta otyryp, qabyrǵalardyń ishki jáne syrtqy árleýiniń zaqymdalǵan ýchaskelerin qalpyna keltirý, baspaldaq alańynyń eden jabynyn jóndeý, baspaldaq tambýrlarynyń ishki esikterin jóndeý. Sondaı-aq aqaýly ýchaskelerdegi elektr jelileri men aspaptardy aýystyrý, metal buıymdar men konstrýksıalyq elementterge korozıaǵa qarsy qurammen óńdeý usynylǵan. Barlyq jumystar qurylys normalaryna sáıkes oryndalýy tıis.
Saraptama qorytyndysynda tehnıkalyq tekserý nátıjeleri boıynsha kirpish turǵyn úıdiń qurylys konstrýksıalarynyń fızıkalyq tozýy tutastaı alǵanda №2 «Jaramdy jumys jaǵdaıy» sanaty boıynsha baǵalanatyny kórsetilgen. Úıdiń jalpy fızıkalyq tozýy 31 paıyzdy quraıdy. Konstrýksıalar men ınjenerlik jelilerdiń paıdalaný senimdiligin qalpyna keltirý úshin qasbetti, sokoldi, shatyrdy, ishki árleýdi, baspaldaq alańyn jáne ınjenerlik komýnıkasıalardy jóndeý qajet.