Astanada keshe elordany sharpyǵan daýyl men qatty nóserden keıin qorshaý turaqta turǵan kólikterdiń ústine qulady. Oqıǵaǵa polısıa pikir bildirdi, dep habarlaıdy infohub.kz.
Oqıǵa ornynan túsirilgen kadrlardy Threads jelisindegi blessedkaz paıdalanýshysy jarıalady. «Búgingi daýyldan keıin Silkway City-degi qorshaý turaqta turǵan kólikterge qulady», — dep jazdy ol. Beınejazbada metal qorshaýdyń birneshe kóliktiń ústinde jatqany kórinedi.
Polısıa kólikterdiń zaqym alǵanyn rastady. Qazirgi ýaqytta tekseris júrgizilýde. «Osy fakti boıynsha polısıa qyzmetkerleri oqıǵa ornyna shyqty. Qatty jeldiń saldarynan qorshaýdyń turaqta turǵan kólikterge qulap, olardyń mehanıkalyq zaqym alǵany anyqtaldy. Qazir tekseris júrgizilip, oqıǵanyń barlyq mán-jaıy anyqtalýda. Tekseris nátıjesi boıynsha Qazaqstan Respýblıkasynyń qoldanystaǵy zańnamasyna sáıkes tıisti sheshim qabyldanady», — dep málimdedi Astana qalasy «Almaty» aýdany polısıa basqarmasy.
Buǵan deıin qatty nóser elordanyń joldaryn sý basyp, kólikterdiń júzýge májbúr bolǵany habarlanǵan edi. Qala turǵyndary aýa raıynyń saldarynan túsirilgen beınejazbalardy áleýmettik jelide belsendi túrde bólisti. Keıinirek bir kúnde qalada aılyq normanyń 70 paıyzy jaýyn-shashyn túskeni anyqtaldy.