Astanadaǵy turǵyn úıdiń kárizinen náreste tabyldy. Bul jergilikti turǵyndardy tań qaldyrdy. Anyqtalǵandaı, úıdiń janyndaǵy qonaq úıge kelgen bir áıel bólmede bosanǵan soń, náresteni ortaq kárizge tastaǵan, dep habarlaıdy infohub.kz saıty.
«Osy jerge kelgen bir áıel bólmedegi dárethanada bosandy da, balany kárizge ıterip jiberdi (káriz bizde ortaq). Kishkentaı 6 aılyq tiri qyz bala», — dep jazdy tatarovna_ atty qoldanýshy Threads áleýmettik jelisinde.
Áıeldiń aıtýynsha, túngi saǵat úshte ony kórshisi oıatqan. Kórshisi kárizden bala tabylǵanyn aıtyp, úıden shyǵyp, qylmystyq izdestirý qyzmetkerlerine kómektesýdi ótingen. «Kelgen qyzmetkerler birden surady, turǵyndardyń arasynda kimniń istegenine kúdigimiz bar ma? Biz eshkimge kúdik joq, bul 100% qonaq úı kelýshileri dep jaýap berdik», — dep qosty jazba avtory.
Turǵynnyń aıtýynsha, qonaq úı turǵyn úıge tym jaqyn, qurylys normalary buzyla salynǵan. Ár túni ashyq terezelerden qatty aıǵaı men shý shyǵady, ony eresekter ǵana emes, balalar da estıdi. Aýdan turǵyndary birneshe jyl boıy shaǵymdanyp keledi, biraq jaǵdaı ózgermeıdi.
Astana qalalyq polısıa departamentiniń málimetinshe, kárizde náresteniń tabylýyna baılanysty «Almaty» aýdandyq polısıa basqarmasy sotqa deıingi tergeýdi bastady. Qylmystyq is aıasynda tergeý-jedel sharalar júrgizilip, sot saraptamalary taǵaıyndaldy. Osy qylmystyq quqyq buzýshylyqqa qatysy bar adam anyqtaldy.