Aqmola oblysynyń tabıǵat qorǵaý prokýratýrasy «Taza Qazaqstan» ekologıalyq aksıasy aıasynda iri zańsyz qoqys polıgonynyń jumysyn toqtatyp, 130-dan astam zańbuzýshyny jaýapkershilikke tartty, dep habarlaıdy infohub.kz.
Tekserý barysynda prokýrorlar Selınograd aýdanynan ruqsat qujattarynsyz 3 gektar jer ýchaskesinde qatty turmystyq qaldyqtardy jınaý, qabyldaý jáne saqtaýmen aınalysqan kásipkerdi anyqtady. Dál osy aýmaqta 2026 jyly birneshe iri órt bolyp, mańaıdaǵy eldi mekenderdiń turǵyndaryna qaýip tóndirip, ekologıaǵa zıan keltirgen.
2026 jylǵy 8 shildede aýdandyq sot kásipkerdi ekologıalyq normalardy buzǵany úshin kináli dep tanydy. Kásipkerge 3 mıllıon teńgeden astam aıyppul salynyp, onyń kásipornynyń qyzmeti alty aıǵa toqtatyldy.
Sonymen qatar, prokýrorlar qurylys jáne turmystyq qoqystardy ruqsatsyz tastaýdyń kóptegen faktilerin anyqtady. Ýákiletti memlekettik organdarǵa stıhıalyq qoqys úıindilerin dereý joıý týraly tapsyrmalar berildi. Budan basqa, sońǵy eki kúnde qadaǵalaý organy abattandyrý erejelerin buzý jáne ortaq paıdalaný oryndaryn — saıabaqtardy, skverlerdi jáne jaǵalaý aımaqtaryn lastaýdyń 130-dan astam deregin tirkedi. Barlyq kináli tulǵalar ákimshilik jaýapkershilikke tartyldy.