Astanada turǵyn úılerdiń qasbetterine kondısıonerlerdi ornalastyrý erejelerin ózgertý josparlanýda. Jańa talaptar qalanyń jańartylǵan dızaın-kodyna engiziledi, dep habarlaıdy infohub.kz.
Astana qalalyq sáýlet jáne qala qurylysy basqarmasynyń málimetinshe, erejeler turǵyn úı synybyna jáne ǵımarattardyń sáýlettik erekshelikterine qaraı belgilenetin bolady. Úılerdiń ár túrli sanaty úshin jeke talaptar qarastyrylady. Basqarma basshysy Altynbek Ahmetov: «Bul qujatta kondısıonerlerdi qalaı jáne qandaı tásilmen ornatý kerektigi naqty sıpattalǵan», — dedi.
Ýrbanıstıka ortalyǵynyń ókili Danıar Chındalıevtiń aıtýynsha, birinshi jáne ekinshi synyptaǵy turǵyn úılerde syrtqy bloktardy qasbet sáýletine saı keletin arnaıy sándik sebetterge ornalastyrý josparlanýda. «Mundaı konstrýksıalar túsi men bezendirilýi jaǵynan ǵımarattyń jalpy kelbetine beıimdelýi tıis», — dep túsindirdi Chındalıev.
Úılerdiń qalǵan sanattary úshin basqa tásil usynylady: kondısıonerler ǵımarattyń sáýlettik sheshimine aldyn ala engizilip, kósheden baıqalmaýy kerek. Chındalıev: «Kondısıonerlerdi tikeleı ǵımarat sáýletine kiriktirý kózdelgen. Olar jasyryn bolýy tıis. Kondısıoner qasbettiń árleýine emes, ǵımarattyń tireýish konstrýksıasyna bekitilýi kerek», — dep naqtylady.
Qazirdiń ózinde salynyp qoıǵan úıler úshin ornatý tártibi ázirge burynǵy qalpynda qalady. Syrtqy bloktardy ornalastyrý týraly sheshim turǵyn úı ıeleriniń jalpy jınalysynda qabyldanady. Alaıda Ahmetovtyń aıtýynsha, turǵyndardyń kelisimi bolsa da, qurylǵy qasbettiń syrtqy kórinisin buzbaý úshin arnaıy elementtermen jabylýy kerek.
Ázirge jańa talaptardyń saqtalýyn baqylaý tetigi men jaýapkershilik sharalary anyqtalmaǵan. Ákimdiktiń habarlaýynsha, dızaın-kod bekitilgennen keıin bul máseleler jeke qujatpen retteletin bolady.