Qazaqstan astanasynda qajetti ınfraqurylymy joq shetki aýdandarda kóppáterli turǵyn úılerdi salýǵa ýaqytsha tyıym salý josparlanýda. Bul shekteý 2035 jylǵa deıin kúshinde bolýy múmkin, dep habarlaıdy infohub.kz saıty.
Astana qalasynyń sáýlet, qala qurylysy jáne jer qatynastary basqarmasynyń basshysy Altynbek Ahmetov qalalyq máslıhattyń VIII saılanymdaǵy kezekten tys sesıasynda tıisti norma qalanyń sáýlettik kelbetin qalyptastyrý jáne qala qurylysyn josparlaý qaǵıdalaryna engizýdi usynyp otyrǵanyn málimdedi.
Ahmetovtiń aıtýynsha, ózgerister QR Premer-Mınıstriniń birinshi orynbasarynyń 2025 jylǵy 10 qarashadaǵy hattamalyq tapsyrmasyn oryndaý úshin daıyndalǵan. Sheneýnik qaǵıdalar jobasy ýákiletti organdarmen kelisilgenin, qoldanystaǵy zańnamaǵa qaıshy kelmeıtinin jáne quqyqtyq aktilerge qoıylatyn talaptarǵa sáıkes keletinin atap ótti.
Ózgeristerdi qabyldaý qosymsha qarjylyq shyǵyndardy talap etpeıdi jáne jeke kásipkerlik sýbektilerine ákimshilik kedergiler týǵyzbaıdy, dep túıindedi Ahmetov.