Astanada 31 tamyzda bolǵan tótenshe jaǵdaı saldarynan aıaǵynan aıyrylǵan munara kranynyń mashınısi Aqmaral Qarabalıeva ómir boıy alıment tóleýdi talap etip otyr, dep habarlaıdy infohub.kz saıty.

Qaıǵyly oqıǵa 31 tamyzda oryn aldy: Astanada munara krany bólshekteý kezinde qulap ketti. Slesar sol jerde qaza tapty, al mashınıstiń oń aıaǵy kesildi.

Úsh balany jalǵyz ózi tárbıelep otyrǵan Aqmaral Qarabalıeva ózine ómir boıy alıment taǵaıyndaýdy talap etedi.

«Biz munara kranynyń bir seksıasyn sheshtik. Sosyn bireý rasıa arqyly: "Ekeýlep alaıyq, onda ne bar!" – dep aıqaılady. Slesarlardyń biri: "Tate, qazir bizdi shaıqaıdy, qoryqpańyz", – dedi. Kran sonshalyqty shaıqaldy, men ushyp kettim! Sodan keıin operasıa ústelinde jattym. Aýyrsynýdy basatyn dáriler kómektespeıdi. Keıde sondaı aýyr bolady, tipti Alladan meni alyp ketýin suraımyn», – deıdi áıel.

Kran mashınısi jumys berýshiniń oǵan múgedekter arbasyn satyp ápergenin jáne úsh aılyq jalaqy mólsherinde ótemaqy tóleýge ýáde bergenin aıtady. Alaıda Aqmaral Qarabalıeva eńbek qabiletinen aıyrylǵandyqtan, ómir boıy alıment talap etedi. Áıeldiń sózinshe, ol jaqynda bólip tóleýge páter satyp alǵan. Turǵyn úı qaryzy 19 mln teńgeden astam.

«Krannyń qulaýynyń tikeleı sebebin anyqtaý úshin mamandandyrylǵan uıym tartyldy. Búgingi tańda qorytyndy áli kelip túsken joq, jumys ústinde. Qyzmetker resmı túrde jumysqa ornalasqan, saqtandyrý sharty bar. Tergeý nátıjeleri boıynsha saqtandyrý tólemderin alý úshin saqtandyrý kompanıasyna jiberiletin akt shyǵarylady», – deıdi Astana qalasy boıynsha memlekettik eńbek ınspeksıasy komıteti departamenti bóliminiń basshysy Rýstam Jandosov.

Sonymen qatar, múgedektik belgilengennen keıin medısınalyq-áleýmettik saraptama Aqmaral Qarabalıevanyń eńbek qabiletinen aıyrylý deńgeıin anyqtaıdy. Jumys berýshiniń oǵan zeınetkerlik jasqa jetkenge deıin aı saıynǵy járdemaqyny qandaı mólsherde tóleıtini osyǵan baılanysty bolady.

Eske salaıyq, buǵan deıin Astanada turǵyn úı kesheniniń qurylysy kezinde qurylys kranynyń qulaǵany habarlanǵan bolatyn. Bir adam qaza tapty, qylmystyq is qozǵaldy.