Astanadaǵy «Syǵanaq» LRT stansıasynyń tóbesinen jańbyrdan keıin sý aqty. City Transportation Systems kompanıasy bul jaýyn-shashynǵa baılanysty emes, ınjenerlik júıelerdi tekserý kezinde bolǵanyn málimdedi, dep habarlaıdy infohub.kz.
Kompanıa ókilderiniń túsindirýinshe, sý aǵý iske qosý-retteý jumystary kezinde, órtke qarsy júıelerdiń jabdyqtaryn tekserý men baptaý barysynda oryn alǵan. «Bul – ınjenerlik júıelerdi iske qosý-retteý jumystaryna baılanysty, ol kezde órtke qarsy júıelerdiń jabdyqtary tekserilip, baptalady», — dep atap ótti CTS.
Kompanıada mundaı jumystar kezinde órt sóndirý júıelerine qyzmet kórsetýge arnalǵan tehnologıalyq lúkter ashylatynyn, keı jaǵdaıda olar arqyly ylǵal kirýi múmkin ekenin naqtylady. «Atalǵan jumystardy júrgizý barysynda órt sóndirý júıelerine qyzmet kórsetýge arnalǵan tehnologıalyq lúkter ashylady, olar arqyly keıbir jaǵdaılarda ylǵaldyń enýi yqtımal», — dep qosty kompanıa ókilderi.
Qazirgi ýaqytta jaǵdaıdy joıý jáne qurylymnyń germetıkalylyǵyn qamtamasyz etý boıynsha sharalar qabyldanýda. «Qazirgi tańda joıý jáne tıisti germetıkalylyqty qamtamasyz etý úshin qajetti sharalar qoldanylýda. Tarlan Astana ádettegi rejımde jumys istep tur», — dep qorytyndylady CTS.