Jańa oqý jylynda elorda mektepteri 35 myńǵa jýyq birinshi synyp oqýshysyn qabyldaýǵa daıyndalýda, bul ótken jylmen salystyrǵanda tórt myńǵa artyq, dep habarlaıdy infohub.kz saıty.
Birinshi synypqa qujat qabyldaý 28 mamyrda bastalyp, 31 tamyzǵa deıin jalǵasady. Astana qalasy Bilim basqarmasynyń málimetinshe, qazirdiń ózinde 30 myńnan astam bala qabyldanǵan.
Salystyrý úshin: ótken oqý jylynda birinshi synypqa 31 myń bala qabyldanǵan bolatyn. 2025–2026 oqý jylynyń basynda elordada 206 mektep jumys istep, onda 310 myńnan astam oqýshy bilim aldy.
Sonymen qatar, 2025 jyly Astanada 28 myń orynǵa arnalǵan jeti jańa mektep ashyldy. Jalpy, oqý jyly ishinde 15 jańa bilim ordasyn paıdalanýǵa berý josparlanǵan bolatyn.
Ata-analar qujattardy «elektrondyq úkimet» portaly arqyly onlaın nemese mektepke jeke baryp tapsyra alady. Qabyldaý úshin qajetti qujattar: ata-ananyń nemese zańdy ókildiń ótinishi; «Profılaktıkalyq egý kartasy» (№065/ý nysany); «Balanyń densaýlyq pasporty» (№052-2/ý nysany); balanyń 3×4 sm kólemindegi sıfrlyq fotosýreti. Qujattardy qaǵaz túrinde tapsyrǵan kezde ata-ananyń nemese zańdy ókildiń jeke kýáliginiń kóshirmesi de qajet bolady.
Buǵan deıin Qazaqstanda 450 myńǵa jýyq balaǵa mektepke daıyndyqqa kómek beriletini habarlanǵan bolatyn. Qoldaýdyń eń tómengi mólsheri bir balaǵa 50,8 myń teńgeni quraıdy.