Qazaqstan astanasynda 1 qyrkúıekte jańa oqý jyly bastaldy. Astana mektepterinde 1–11-synyp oqýshylaryna arnalǵan alǵashqy synyp saǵattary «Qazaqstan Respýblıkasynyń Konstıtýsıasy – adal azamat, zerdeli ult jáne jaýapty qoǵam qalyptastyrýdyń negizi» taqyrybynda ótti, dep habarlaıdy infohub.kz saıty.
İs-sharalar «Adal azamat» biryńǵaı tárbıe baǵdarlamasy aıasynda uıymdastyryldy. Oqýshylarǵa QR Konstıtýsıasyna engizilgen ózgerister men tolyqtyrýlardyń máni túsindirilip, quqyqtyq mádenıetti qalyptastyrýǵa, azamattyq jaýapkershilikti arttyrýǵa jáne ulttyq qundylyqtardy qurmetteýge erekshe kóńil bólinýde. «Adal azamat», «Taza Qazaqstan», «Zań jáne tártip» jáne «Tolyq adam» qundylyqtaryna jeke toqtalady. Oqýshylarmen óz is-áreketteri úshin jaýapkershilik, zańdy saqtaý, basqalardy qurmetteý jáne qorshaǵan ortaǵa uqypty qaraý máseleleri talqylanady.
Jańa 2026–2027 oqý jylynda astananyń 206 orta bilim berý uıymynda 337 myńnan astam bala oqıdy. Onyń shamamen 33 myńy bıyl mektep tabaldyryǵyn alǵash ret attady. Oqý jylynyń basyna qaraı astananyń bilim mekemeleri keshendi daıyndyqtan ótti. Qaýipsizdik, ınternet baılanysynyń sapasy, sanıtarlyq jaǵdaı jáne tamaqtandyrýdy uıymdastyrý máselelerine erekshe nazar aýdaryldy. Barlyq memlekettik mektepter beınebaqylaý júıelerimen jabdyqtalǵan, al kameralar men dabyl túımeleri biryńǵaı sıtýasıalyq ortalyqqa jáne polısıa departamentiniń jedel basqarý ortalyǵyna qosylǵan.
Oqýshylardy oqýlyqtarmen jáne oqý-ádistemelik keshendermen qamtamasyz etý úshin bıyl 14 baspadan 1,2 mıllıonnan astam dana satyp alyndy. Memlekettik mektepterdiń bastaýysh synyptary men áleýmettik osal toptaǵy balalar tegin ystyq tamaqpen tolyq qamtamasyz etilgen.
Sonymen qatar, jańa oqý jyly qarsańynda astanada №13, №41, №72, №73, №79, №82 jáne №86 mektepter janynan 7 qosymsha oqý ǵımaraty jáne 2 jekemenshik mektep ashyldy. Jańa nysandar qosymsha oqýshy oryndaryn qurýǵa jáne qoldanystaǵy mektepterge júktemeni azaıtýǵa múmkindik beredi.