Qazaqstan astanasynda ákimshilik ǵımarattardyń birinde ádepsiz oqıǵa uıymdastyrǵan 68 jastaǵy er adamǵa qatysty úkim shyǵaryldy, dep habarlaıdy infohub.kz saıty.
Astana sottarynyń málimetinshe, 24 tamyzda mamandandyrylǵan aýdanaralyq ákimshilik quqyq buzýshylyqtar soty azamat J.-ǵa qatysty isti qarady. Ol usaq buzaqylyq jasady dep aıyptaldy. İs materıaldary boıynsha, tańǵy saǵat 09:28 shamasynda J. Máńgilik El dańǵylyndaǵy Azamattardy qabyldaý ortalyǵynda metal izdegishten ótý kezinde shalbaryn sheship, qoǵamdyq tártip pen azamattardyń tynyshtyǵyn buzǵan.
Sot otyrysynda J. óz kinásin moıyndamaı, bul áreketin ázil retinde jasaǵanyn aıtty. Alaıda onyń kinási is materıaldarymen jáne oqıǵanyń beınejazbasymen rastaldy.
ÁQBtK-niń 434-babynyń 1-bóliginiń sanksıasy 20 AEK mólsherinde aıyppul salýdy, ne 20 saǵattan 60 saǵatqa deıingi merzimge qoǵamdyq jumystarǵa tartýdy, ne 5 táýlikten 10 táýlikke deıingi merzimge ákimshilik qamaýǵa alýdy kózdeıdi. Jaza taǵaıyndaý kezinde sot jasalǵan árekettiń dárejesi men sıpatyn, ıaǵnı laıyqsyz minez-qulyq pen qoǵamǵa ashyq qurmetsizdik tanytýdy eskerdi. Sonymen qatar, sot ÁQBtK-niń 50-babyna sáıkes ákimshilik qamaý 63 jastan asqan adamdarǵa qoldanylmaıtynyn nazarǵa aldy.
Sot qaýlysymen J. ÁQBtK-niń 434-babynyń 1-bóliginde kináli dep tanylyp, 86 500 teńge (20 AEK) mólsherinde aıyppul túrindegi ákimshilik jazaǵa tartyldy. Qaýly zańdy kúshine engen joq.