Astanada eki kúnge sozylǵan nóserden 39 mıllımetr jaýyn-shashyn tústi (aılyq normanyń 70%-y derlik). Kósheler, turǵyn úı keshenderiniń jertóleleri men kireberisteri sý astynda qaldy. Qatty jel aǵashtardy qulatyp, dýaldardy qıratty, ondaǵan avtokólik sýǵa batty. Zardap shekkender qala bıliginen shyǵyndy óteýdi talap etýde. Bul týraly infohub.kz saıty habarlaıdy.
Qala ákimdiginiń málimetinshe, nebári 22 mınýttyń ishinde 11,5 mıllımetr jaýyn-shashyn túsken. Keıbir turǵyn úı keshenderinde jertóleler, sokoldyq qabattar men kireberister sý astynda qaldy. OSI tóraǵasy Nýrsultan Aımdosovtyń aıtýynsha, shatyrdan nóser sýy lyqsyp aǵyp, baseın áserin týǵyzyp, jalǵyz nóser qudyǵy kótere almaǵan. «Sý tizege deıin kóterildi. Myna tabaldyryq ońaı attalyp, barlyǵy NP-larǵa quıylady, sol NP-lar arqyly bizdiń podvalǵa ketedi», — dedi ol.
Elordanyń basqa da turǵyn úı keshenderi sý astynda qaldy. Sýdy sorǵyzǵanymen, nóserdiń saldary áli de baıqalady: keıbir úılerde lıft jumys istemeıdi, jertóleler ylǵal bolyp tur.
Eń kóp zardap shekkender — avtokólik ıeleri. Sý basqan kóshelerde ondaǵan mashına tolyqtaı sý astynda qalyp, ıeleri ústińgi jaǵyna shyǵyp qutylǵan. Zańgerlerdiń túsindirýinshe, eger saraptama nóser káriziniń aqaýyn nemese tıisti kútimniń joqtyǵyn rastasa, ótemaqy talap etýge bolady. Zardap shekkenderdiń kóbi ákimdikke beıneúndeý jazyp jatyr.
Zardap shekken Robert Dosaev: «Men osy aýdannyń ákimi men aýdandyq ákimdiktiń shyǵyndy ótep, kóligimdi qalpyna keltirýin talap etemin. Sebebi qozǵaltqysh jumys istemeıdi, elektrondy júıe isten shyqty — mashına múldem jaramsyz. Sondyqtan bizdiń talap — kólikti tolyq qalpyna keltirip, keltirilgen shyǵyndy óteý. Biz tolyq ótemaqyny talap etemiz», — dedi.
Qutqarýshylar men komýnaldyq qyzmetter jedel jetti. Olar sýdy sorǵyzyp, adamdardy evakýasıalap, kólikterdi súıredi. Astana qalasy Tótenshe jaǵdaılar departamenti TJ joıý basqarmasynyń bastyǵy Baýyrjan Ahmetalınniń aıtýynsha: «Astana qalasy aýmaǵynda mol jaýyn-shashyn saldarynan kósheler men aýmaqtardy sý basý, aǵashtardyń qulaýy jáne elektr qýatynyń óshýi tirkeldi. Astana qalasy Tótenshe jaǵdaılar departamenti komýnaldyq qyzmetterge kómek kórsetti, oǵan 36 adam, 12 birlik tehnıka, sondaı-aq 8 motopompa jumyldyryldy. Jumystar jaýyn sýyn sorǵyzý, turǵyndardy evakýasıalaý, kólikterdi qutqarý jáne aǵashtardy kesý boıynsha júrgizildi», — dedi.
Sınoptıkterdiń dereginshe, Astanada jańbyr 25, 28 jáne 29 shildede jalǵasady, qarqyndylyǵy 14 mıllımetrge deıin jetedi. Kelesi aptada temperatýra +32...+34 gradýsqa deıin kóteriledi. TJD qatty jaýyn-shashyn kezinde múmkindiginshe syrtqa shyqpaýǵa jáne jeke kólikpen júrýden bas tartýǵa keńes beredi.