Astanadaǵy «Nurly jol» temirjol vokzalynda kondısıonerlerdiń jumys istemeýine baılanysty jolaýshylar shaǵymdanǵannan keıin, «Qazaqstan temir joly» kompanıasy kondısıonerleý jáne jeldetý júıelerindegi aqaýlyqtardy moıyndady. Bul týraly infohub.kz saıty habarlaıdy.
Threads áleýmettik jelisiniń bir qoldanýshysy ashýly habarlama jarıalap, onda: «Astana, «Nurly jol» vokzaly, basshylyqqa uıat. Kondısıonerler kóp bolǵanymen, vokzalda aptap ystyq», – dep jazdy. Keıbir jolaýshylar kondısıonerlerdiń múlde joqtyǵyn aıtty.
QTJ baspasóz qyzmeti: «„Nurly jol" temirjol vokzal kesheniniń ǵımaratynda kondısıonerleý jáne jeldetý júıeleriniń jumysynda aqaýlar anyqtaldy, bul bólmelerdegi temperatýranyń kóterilýine ákeldi. Qazirgi ýaqytta jabdyqty ýaqtyly tehnıkalyq qyzmet kórsetpegen merdiger uıymǵa qatysty talap-shaǵym jumystary júrgizilýde», – dep málimdedi. Kompanıada qosymsha qoldanystaǵy kondısıonerleý jáne jeldetý júıelerine kúrdeli jóndeý júrgizý máselesi de qarastyrylyp jatqanyn aıtty.
Budan buryn Astana vokzaly káriz júıesindegi aqaýlarǵa baılanysty sý basqany habarlanǵan edi.