Astanada qarjy pıramıdasyn quryp, 100-den astam azamatty aldaǵan uıymdasqan qylmystyq top músheleri sottaldy, dep habarlaıdy infohub.kz.
Sot anyqtaǵandaı, qylmystyq top quramyna rólderi naqty bólingen 10-nan astam adam kirgen. Alaıaqtar 1-den 2 mln teńgege deıin aqshalaı syıaqy tóleıtinin aıtyp, azamattardy kólik nesıesin rásimdeýge kóndirip, nesıe mindettemelerin ózderi óteıtinin ýáde etken. Alaıda alynǵan kólikter zańsyz satylyp, onyń ishinde Qazaqstannan tys jerlerge shyǵarylǵan.
Prokýratýranyń málimetinshe, qylmystyq áreket saldarynan 100-den astam azamat zardap shekken dep tanylyp, 165 kólik rásimdelgen.
«Sot úkimimen kináliler uıymdasqan qylmystyq top qurý jáne ony basqarý, qarjy pıramıdasyn qurý jáne basqarý, sondaı-aq alaıaqtyq úshin sottaldy. Olarǵa 5 jyldan 8 jylǵa deıin bas bostandyǵynan aıyrý jazasy taǵaıyndaldy», — dedi prokýratýrada.
Sondaı-aq, zardap shekkenderdiń azamattyq talaptary qanaǵattandyrylǵany habarlandy.