Búgin, 6 qyrkúıekte, Astanada salynyp jatqan turǵyn úıde órt boldy. Qutqarýshylar órtti jedel túrde sóndirdi, dep habarlaıdy infohub.kz.
Tótenshe jaǵdaılar mınıstrliginiń málimetinshe, ot Saraıshyq aýdanyndaǵy salynyp jatqan 12 qabatty ǵımaratty sharpyǵan. Oqıǵa ornyna alǵashqy bólimsheler kelgende, birinshi qabattan jetinshi qabatqa deıin jylytqysh materıal ashyq jalynmen janǵany anyqtaldy.
Vedomstvo: "Dereý órt sóndirý oqpandary berildi. Órtti tolyq sóndirý jumystary júrgizilýde. Sýdyń úzdiksiz berilýi qamtamasyz etildi", - dep atap ótti.
Saǵat 14:50-de órt tolyǵymen sóndirildi. Zardap shekkender joq.
Eske salaıyq, buǵan deıin Eńbek jáne halyqty áleýmettik qorǵaý mınıstrligi Astanadaǵy qurylys alańdaryndaǵy qaýipsizdik baqylaýyn kúsheıtetinin málimdegen bolatyn. Bul eki oqıǵadan keıin boldy: 27 tamyzda qurylys krany qulap, kran mashınısi qaza tapty, al 31 tamyzda munaraly kran qulaǵanda bir adam qaza taýyp, eki adam zardap shekti.