17 qyrkúıek kúni keshke Qazaqstan astanasyndaǵy turǵyn úılerdiń biriniń aýlasynda oq atylyp, polısıa qyzmetkerleri bolǵan oqıǵanyń mán-jaıyn jarıalady, dep habarlaıdy infohub.kz saıty.
Astana qalalyq polısıa departamenti NUR.KZ tilshisine habarlaǵandaı, 17 qyrkúıek kúni keshke polısıaǵa turǵyn úılerdiń biriniń aýlasynda oq atylǵany týraly shaqyrtý túsken.
«Oqıǵa ornyna patrúldik polısıa ekıpajdary jedel jetti. Aldyn ala anyqtalǵandaı, turǵyn úı aýlasynda mas kúıdegi jasóspirimder toby bolyp, olar ózderin agressıvti ustaǵan. Úı turǵyndarynyń biri quqyqqa qarsy áreketterdiń aldyn alý maqsatynda gaz tapanshasynan áýege eskertý oǵyń atyp jibergen», — dedi vedomstvoda.
Barlyq qatysýshylar oqıǵa ornynda ustalyp, polısıaǵa jetkizildi. Quqyq buzýshylarǵa zańnamaǵa sáıkes shara qoldanylatyn bolady.
«Turǵyndardyń jaralanǵany týraly aqparat shyndyqqa sáıkes kelmeıdi. Kórineý jalǵan aqparat taratqany úshin jaýapkershilik qarastyrylǵanyn eskertemiz. Azamattardy resmı derekkózderge senýge shaqyramyz», — dedi polısıada.
Oqıǵa ornynan túsirilgen beınejazbany Halyqstan Telegram-arnasy jarıalady.