Astanada polısıa 29 jastaǵy áıeldi ustady. Ol qonaqúılerdiń birinde bosanǵan soń, náresteni kárizge tastady degen kúdikke ilindi. Bul týraly infohub.kz saıty habarlaıdy.
Bul oqıǵa týraly aqparat áleýmettik jelilerde tarady. Astana polısıa departamenti faktini rastap, kúdiktiniń ustalǵanyn habarlady.
Áleýmettik jelilerdegi málimetke sáıkes, áıel júktiliktiń altynshy aıynda merziminen buryn bosanǵan.
Polısıanyń málimetinshe, náresteniń kárizden tabylýyna baılanysty sotqa deıingi tergeý júrgizilýde.
Qonaqúıdiń janyndaǵy turǵyn úı kesheniniń turǵyndary qonaqúı ishinen shyqqan úreıli aıqaılarǵa birneshe ret shaǵymdanǵan. Olardyń aıtýynsha, ár tún saıyn patrúl shaqyrady, alaıda polısıa tıisti sharalardy qoldanbaıdy.
Astana polısıa departamentiniń habarlaýynsha, 2026 jyldyń basynan beri osy qonaqúıden 102 arnasyna 19 habarlama túsken. «Túngi tynyshtyqty buzǵany úshin 13 adam, qoǵamdyq tártipti buzǵany úshin 3 adam ákimshilik jaýapkershilikke tartyldy», — dep málimdedi polıseıler.
Qonaqúı ıesine qylmystyq quqyq buzýshylyqtarǵa yqpal etetin sebepter men jaǵdaılardy joıý týraly usynys berildi. «Bul aýmaq ýchaskelik polısıa ınspektorlarynyń turaqty baqylaýynda», — dep túıindedi departamentten.
Buǵan deıin Aqtóbede qoqys paketinen tiri náreste tabylǵany habarlanǵan bolatyn.