Astana polısıasy Prezıdenttik saıabaqta qyzǵa shabýyl jasalǵany týraly habarlamadan keıin 27 jastaǵy er adamdy ustady, dep habarlaıdy infohub.kz saıty.
29 shildede áleýmettik jelide Astana turǵynynyń Prezıdenttik saıabaqtaǵy shabýyl týraly aıtqan vıdeosy tarady. Onyń aıtýynsha, tańerteń belgisiz er adam ony ustap alǵan, alaıda aıqaıdan keıin jiberip, jaqyn mańdaǵy turǵyn úı keshenine qaraı qashyp ketken. Oqıǵadan keıin qyz polısıaǵa aryzdanǵan.
Sondaı-aq Threads jelisinde oqıǵa týraly aqparat taratýǵa shaqyrý paıda boldy. Jarıalanymda shabýyl saǵat 09:05 shamasynda Saraıshyq kóshesiniń mańynda, Beıbitshilik jáne kelisim saraıynyń qasynda bolǵany aıtylǵan. Avtor belgisiz bireý qyzǵa jumysqa bara jatqanda shabýyl jasap, zorlyq kórsetýge tyrysqanyn málimdegen. Bul jarıalanymǵa İshki ister mınıstrligi (İİM) reaksıa bildirip, polısıa qyzmetkerleri dereý izdestirý sharalaryn bastaǵanyn habarlady.
«Elorda turǵynyna qatysty saıabaq aýmaǵynda jasalǵan quqyqqa qaıshy áreketter boıynsha polısıa qyzmetkerleri dereý izdestirý sharalaryn júrgizdi. Qysqa merzimde quqyq buzýshynyń jeke basy anyqtaldy. 27 jastaǵy er adam ustalyp, polısıaǵa jetkizildi. Qazir ol ýaqytsha ustaý kamerasyna ornalastyryldy», — delingen İİM habarlamasynda.
Vedomstvo er adamnyń usaq buzaqylyq úshin jaýapqa tartylǵanyn naqtylady. Materıaldar qaraý úshin sotqa jiberildi. «Polısıa eske salady: qoǵamdyq tártip pen azamattardyń qaýipsizdigin buzatyn kez kelgen quqyqqa qaıshy áreket dereý toqtatylady, al kináliler zańǵa sáıkes jaýapkershilikke tartylady», — dep atap ótti İİM.