Qazaqstan astanasynda bir otbasynyń tórt múshesi kámeletke tolmaǵandardy tartqan prıton uıymdastyrdy dep kúdiktenýde. Bul týraly infohub.kz saıty habarlaıdy.
Bas prokýratýranyń dereginshe, tergeý 15 adamǵa qatysty júrgizilgen, olardyń arasynda bir otbasynyń birneshe ókili bar.
«Tergeý barysynda 2023–2025 jyldary eki apaly-sińlili jubaılarymen birge turǵyn úı keshenderinde jynystyq qyzmet kórsetý úshin prıton qurǵany anyqtaldy. Qylmystyq top quramynda kúzetshiler, ákimshiler, sondaı-aq áleýmettik jeliler men messendjerler arqyly qyzmet jarnamalaǵan adamdar boldy», — delingen habarlamada.
Uıymdastyrýshylar qalanyń túngi klýbtarynan qyzdardy izdep, olarǵa joǵary tabys, turǵyn úı, qaýipsizdik jáne qupıalylyq ýáde etken bolýy múmkin.
«Sonymen qatar qylmyskerler klıentterdiń аlkogóldik masań kúıin paıdalanyp, olarǵa dene kúshin qoldanǵan, aqshalaryn bopsalaǵan jáne jaldamaly páterlerde zańsyz ustaǵan», — dep qosty Bas prokýratýrada.
15 qatysýshynyń barlyǵy ustaldy, olarǵa qatysty qamaýda ustaý jáne úıqamaq túrindegi bultartpaý sharasy tańdaldy.
Astana prokýratýrasy qylmystyq isti sotqa jiberdi. Aıyptalýshynyń áreketterine túpkilikti quqyqtyq baǵa sot otyrysy barysynda beriledi.