Astanadaǵy úılerdiń biriniń aýlasynda seısenbi kúni áıel adamǵa pyshaqpen shabýyl jasalyp, ol alǵan jaraqatynan sol jerde kóz jumdy. Bul týraly qalalyq Polısıa departamenti habarlady, dep jazady infohub.kz.
Oqıǵa týraly aqparat Shyndyk.kz Telegram-arnasynda jarıalandy. Arnanyń dereginshe, 1996 jyly týǵan áıelge Astananyń bir aýlasynda pyshaqpen shabýyl jasalǵan. «Aldyn ala málimetterge súıensek, áıel kóligin aýlada turaqqa qoıyp jatqanda, oǵan pyshaq ustaǵan er adam shabýyl jasaǵan. Kýágerler shabýyldan keıin onyń qashyp ketkenin aıtqan. Kórshilerdiń sózinshe, marqum shabýyldaýshymen tanys bolýy múmkin. Boljam boıynsha, ol áıeldiń burynǵy kúıeýi. Áıeldiń eki balasy qaldy», — delingen jarıalanymda.
«Astana — Chto? Gde? Kogda?» Telegram-arnasynyń málimetinshe, óltirilgen áıeldiń burynǵy jubaıy bolyp tabylatyn er adam ustalǵan.
Astana Polısıa departamentiniń baspasóz qyzmeti NUR.KZ tilshisine habarlaǵandaı, 23 qyrkúıekte saǵat 20:00 shamasynda polısıaǵa áıelge shabýyl jasalǵany týraly habarlama túsken. «Oqıǵa ornyna dereý polısıa qyzmetkerleri keldi. Er adamnyń áıelge pyshaq jaraqatyn salǵany anyqtaldy», — dedi vedomstvoda.
Alǵan jaraqatynan zardap shekken áıel sol jerde kóz jumdy. Kúdikti jedel ustalyp, ýaqytsha ustaý ızolátoryna qamaldy. Kisi óltirý faktisi boıynsha qylmystyq is qozǵalyp, tergeý sharalarynyń kesheni júrgizilýde.
Polısıa departamentinde sondaı-aq boljamdy qanisherdiń quqyq qorǵaý organynyń qyzmetkeri ekeni týraly aqparat joqqa shyǵaryldy. «Kúdiktiniń polısıa qyzmetkeri ekeni týraly taraǵan aqparat shyndyqqa sáıkes kelmeıtinin habarlaımyz. Tergeý barysy Polısıa departamenti basshylyǵynyń erekshe baqylaýynda. Kináli adam zańnyń barlyq qatańdyǵymen jaýapqa tartylady», — dep qosty vedomstvoda.