Astanada qalalyq elektr poıyzdaryn qoǵamdyq kóliktiń jańa túri retinde iske qosý múmkindigi qarastyrylýda. Elordanyń sáýlet, qala qurylysy jáne jer qatynastary basqarmasy bul bastamanyń bólshekteri men boljamdy merzimin ashyp aıtty, dep habarlaıdy infohub.kz saıty.
Buǵan deıin Astanadaǵy jelige jalpy syıymdylyǵy 500 jolaýshyǵa deıingi bes poıyz jiberý josparlanyp otyrǵany habarlanǵan. Keleshekte elektr poıyzdary táýligine 16 myń adamǵa deıin tasymaldaı alady. Bul — LRT nemese avtobýstarǵa uqsas qoǵamdyq kóliktiń jańa túri ekeni aıtylǵan.
NUR.KZ tilshisi Astananyń sáýlet, qala qurylysy jáne jer qatynastary basqarmasynyń baspasóz qyzmetine josparlanǵan iske qosý týraly tolyǵyraq aıtyp berýin surap, saýal joldady. Vedomstvo sheshimniń ázirge túpkilikti qabyldanbaǵanyn, elektr poıyzdaryn iske qosý nusqasy usynys mártebesinde turǵanyn atap ótti.
«Uzaq merzimdi keleshekte temirjol kóligin qalaishilik jolaýshylar tasymalynyń bir túri retinde damytý úshin shamamen 2050 jylǵa qaraı qalada árqaısysynyń syıymdylyǵy 500 jolaýshyǵa deıingi bes poıyzdy paıdalaný múmkindigi qarastyrylýda», — dedi basqarmada.
Sondaı-aq jańa temirjol jelilerin salý qajet emes ekeni atap ótildi. Sebebi ázirge Astana-1 — Nurly jol baǵytyndaǵy qoldanystaǵy temirjol tarmaǵyn paıdalaný múmkindigi qarastyrylýda.
Keleshekte stansıalar negizgi qalalyq magıstraldarmen qıylysatyn jerlerde, sonyń ishinde Pýshkın jáne Qoshqarbaev kósheleriniń tusynda ornalasady.
Buǵan deıin elektr poıyzyndaǵy stansıalar qandaı bolýy múmkin ekeni de habarlanǵan: Qaraǵandy kólik haby, Mustafın kóshesi, Pýshkın kóshesi, Bógenbaı batyr dańǵyly.