Astanada Qoshqarbaev dańǵylynda 15-20 qyrkúıek aralyǵynda kólik qozǵalysy shekteledi. Bul týraly infohub.kz saıty habarlaıdy.
Elorda ákimdiginiń málimetinshe, jóndeý jumystary Sh. Qudaıberdiuly men Abylaı han dańǵyldarynyń aralyǵyndaǵy ýchaskede júrgiziledi. «Astanada 15-20 qyrkúıek aralyǵynda R. Qoshqarbaev dańǵylynda, Sh. Qudaıberdiuly men Abylaı han dańǵyldarynyń aralyǵyndaǵy ýchaskede salmaq ólsheıtin dachıkter astyna asfáltbeton jabyn tóseý jumystary júrgiziledi», — delingen qala ákimdiginiń habarlamasynda.
Jol jumystaryna baılanysty atalǵan ýchaskede kólik qozǵalysy eki baǵytta da joldyń bir jaǵymen uıymdastyrylady.
Ákimdik qaýipsizdikti qamtamasyz etip, qolaısyzdyqty azaıtý úshin jergilikti jerde jol belgileri men kórsetkishter ornatylatynyn qosty. «Júrgizýshiler men jaıaý júrginshilerden marshrýttaryn aldyn ala josparlap, qozǵalysty uıymdastyrýdaǵy yqtımal ózgeristerdi eskerý suralady», — dep atap ótti qala ákimdiginde.
Buǵan deıin Astanada jóndeý jumystaryna baılanysty Nurmaǵambetov kóshesinde kólik qozǵalysy ishinara jabylatyny habarlanǵan bolatyn.