Astanada kámeletke tolmaǵan balaǵa qurylys alańyn qorshaǵan proflıst qulady. Merdigerdiń jaýapty ókili ákimshilik jaýapkershilikke tartyldy, dep habarlaıdy infohub.kz saıty.
Elordadaǵy proflıstiń qulaýy týraly Threads áleýmettik jelisinde valena8602 laqap atymen tirkelgen qoldanýshy jazdy.
«Nura aýdanynda balaǵa proflıst qulady. Jaqyn mańdaǵy úılerdiń turǵyndary ákimdikke birneshe ret hat jazyp, aýdandy abattandyrýdy suraǵan. Sebebi adamdar aıaldamaǵa qorshaýdyń boıymen júrip barady, aınalasy batpaq. Úsh jyldan beri qurylys júrip, qazylyp jatqan jerde qarapaıym turmys jaǵdaıy joq. Halyqtyń daýysyn estý úshin osyndaı jaǵdaıǵa jetý kerek pe?» — delingen jazbada.
Jarıalanymǵa Astana qalalyq polısıa departamenti jaýap berdi.
«Qurylys nysanynyń aýmaǵyn tıisti deńgeıde ustamaǵany úshin merdigerdiń jaýapty ókili (ýchaske bastyǵy) abattandyrý erejelerin buzǵany úshin ákimshilik jaýapkershilikke tartyldy. Osy fakti boıynsha Nura aýdanynyń polısıa basqarmasy jaraqat alǵan kámeletke tolmaǵan balaǵa qajetti medısınalyq kómek kórsetilgenin, onyń ómiri men densaýlyǵyna qaýip tónbeıtinin habarlaıdy. Quqyq qorǵaý organdary qurylys kompanıalary men jaýapty tulǵalarǵa qaýipsizdik normalaryn qatań saqtaý jáne irgeles aýmaqtarda tártipti ustaý qajettigin eske salady», — dedi polısıada.