Astanada tanysyn qurylys materıaldaryn satyp alý kezinde aldap, iri kólemdegi aqshany ıemdengen kúdikti ustaldy, dep habarlaıdy infohub.kz saıty.
İshki ister mınıstrliginiń vedimistik saıtynyń málimetinshe, polıseıler kúdiktiniń tulǵasyn anyqtady. Ol azamattyń senimine kirip, qurylys materıaldaryn jetkizý syltaýymen iri kólemdegi aqsha qarajatyn ıemdengen.
Tergeý barysynda elordanyń 44 jastaǵy turǵyny zardap shekkenge qurylysqa qajetti kirpishti qoljetimdi baǵamen jáne qysqa merzimde jetkizip beretinin ýáde etkeni anyqtaldy. Ol óz nıetiniń shynaıylyǵyna sendirip, 1 mıllıon 300 myń teńge kóleminde aldyn ala tólem jasaýdy suraǵan. Zardap shekken aqshany onyń jeke shotyna aýdarǵan.
Tergeý derekteri boıynsha, aqshany alǵannan keıin kúdikti ýáde etken qurylys materıaldaryn jetkizbegen. Biraz ýaqyt ol ártúrli syltaýlarmen tapsyrysty oryndaýdy keıinge shegerip, keıin zardap shekkenmen baılanysqa múldem shyqpaı qoıǵan. Osylaısha, ol senimdi teris paıdalanyp, aqshany alaıaqtyq jolmen ıemdengen.
Zardap shekken polısıaǵa júgingennen keıin jedel-izdestirý is-sharalary nátıjesinde kúdiktiniń tulǵasy anyqtaldy. Ol kinásin moıyndady. Osy fakti boıynsha sotqa deıingi tergeý júrgizilýde.
Polısıa qazaqstandyqtarǵa eskertedi: qurylys materıaldaryn nemese basqa da qymbat taýarlardy satyp alý kezinde satýshynyń jeke basyn, onyń qyzmetiniń zańdylyǵyn jáne iskerlik bedelin muqıat tekserý qajet.